孫笠偏我真忝，食甲夠，致出予我刣死，我這馬滿心肝真歡喜，敨一腹氣。

孫笠偏我真忝，食甲夠，致出予我刣死，我這馬滿心肝真歡喜，敨一腹氣。

Sun Li̍p phiⁿ góa chin thiám, chia̍h-kah-kàu, tì-chhut hō͘ góa thâi--sí, góa chit-má móa-sim-koaⁿ chin hoaⁿ-hí, tháu-chi̍t-pak-khì.

語苑 第34卷第10號 昭和16年1941年10月16日頁47-54 臺灣語通信研究會

刑事警察の部 第三十五課 強盜殺人犯人取調 

特藏臺灣期刊文獻 · 刑事警察の部 · 國立臺灣大學圖書館數位典藏館 

　問：你將家己的旺梨園賣人，百齡堂藥店共吳昌儀買。彼是按怎？

　Mn̄g: Lí chiong ka-tī ê ōng-lâi-hn̂g bōe--lâng, pah-lêng-tn̂g io̍h-tiàm kā Ngô͘ Chhiong-gî bóe. He sī-án-chóaⁿ? 

　答：作旺梨園，倒了。　昌儀講：𪜶彼間藥店欲褪人。　才賣（旺梨園），共伊買藥店。　旺梨園賣人千八箍，猶彼間藥店權利六百箍，藥仔照價照算，計共五千六百箍愛予伊。

　Tap: Choh ōng-lâi-hn̂g, tò liáu.　Chhiong-gî kóng: In hit keng io̍h-tiàm beh thǹg--lâng.　Chiah bōe (Ōng-lâi-hn̂g) , kā i bóe io̍h-tiàm. 　 Ōng-lâi-hn̂g bōe-lâng chheng-poeh-kho͘, iá hit-keng io̍h-tiàm khoân-lī la̍k-pah-kho͘, io̍h-á chiàu kè chiàu sǹg, kè kiōng gō͘-chheng la̍k-pah kho͘ ài hō͘--i. 

　問：彼五千六，攏交伊清楚無？

　Mn̄g: He gō͘-chheng-la̍k, lóng kau i chheng-chhó bô? 

　答：先提現金兩百箍予伊，賰的一月日兩百箍做月攤伻還伊，到前年年尾找伊清楚。 

　Tap: Seng the̍h hiān-kim nn̄g-pah-kho͘ hō͘--i, chhun--ê chi̍t-ge̍h-ji̍t nn̄g-pah-kho͘ chòe ge̍h-thoaⁿ pheⁿ-hêng--i, kàu chûn--nî nî-bé chāu i chheng-chhó. 

　問：彼間藥店，你閣褪予孫笠，彼个情形，講予我聽。 

　Mn̄g: Hit-keng io̍h-tiàm, lí koh thǹg hō͘ Sun Li̍p, hit-ê chêng-hêng, kóng hō͘ góa thiaⁿ. 

　答：我本身較無經驗，閣愛伻還一月日兩百箍，按呢做了一直塌落去。　彼孫笠共我講：彼間若做較大，較有趁錢。　叫我彼間褪伊，另外邊仔閣做一間。　藥仔伊欲賒我，等候賣了才提錢予伊無要緊。　伊好喙拐我，才賣伊千七箍，講現錢欲交我。　藥品點交了，一日過一日，紲無錢通予我。　伊開三張高砂信用組合的手形，予我去領，領無。　我欠頂手的藥仔錢，伊替我還，賰的五百外箍，長短找我。　

　Tap: Góa pún-sin khah bô keng-giām, koh ài pheⁿ-hêng chi̍t-ge̍h-ji̍t nn̄g-pah-kho͘, án-ni chòe-liáu it-ti̍t lap--lo̍h-khì. 　He Sun Li̍p kā góa kóng: Hit-keng nā chòe khah tōa, khah ū thàn-chîⁿ. 　Kiò góa hit-keng thǹg--i, lēng-gōa piⁿ--á koh chòe chi̍t-keng. 　Io̍h-á i beh sia--góa, tán-hāu bōe-liáu chiah the̍h chîⁿ hō͘ i bô-iàu-kín. 　I hó-chhùi koái--góa, chiah bōe i chheng-chhit-kho͘, kóng hiān chîⁿ beh kau--góa. 　Io̍h-phín tiám-kau liáu, chi̍t-ji̍t kè chi̍t-ji̍t, sòa bô chîⁿ thang hō͘--góa. 　I khui saⁿ-tiuⁿ Ko-soa Sìn-iōng-cho͘-ha̍p ê chhiú-hêng, hō͘ góa khì niá, niá bô. 　Góa khiàm téng-chhiú ê io̍h-á-chîⁿ, i thè góa hêng, chhun--ê gō͘-pah-gōa-kho͘, tn̂g-té chāu--góa. 

　問：你另外閣開一間藥仔店，做無兩三月日就關起來，彼是按怎？

　Mn̄g: Lí lēng-gōa koh khui chi̍t-keng io̍h-á-tiàm, chòe bô nn̄g-saⁿ ge̍h-ji̍t chiū koaiⁿ--khí-lâi, he sī-án-chóaⁿ? 

　答：我閣開四五百箍開藥店，伊賒我四百箍的藥仔。　伊明品講賣了才欲提錢，無影無跡，物提了隔日就欲提錢。　結局拍袂直，商品還伊，猶有欠伊一百箍。

　Tap: Góa koh khai sì-gō͘-pah-kho͘ khui io̍h-tiàm, i sia góa sì-pah-kho͘ ê io̍h-á. 　I bêng-phín-kóng bōe-liáu chiah beh the̍h chîⁿ, bô-iáⁿ-bô-chiah, mi̍h the̍h-liáu keh-ji̍t chiū beh the̍h chîⁿ. 　Kiat-kio̍k phah-bōe-ti̍t, siong-phín hēng--i, iá-ū khiàm i chi̍t-pah-kho͘.

　問：你欠伊一百箍，伊有共你討真緊，著毋？　

　Mn̄g: Lí khiàm i chi̍t-pah-kho͘, i ū kā lí thó chin-kín, tio̍h m̄? 

　答：有喔，不時都共我討。　我規个予伊騙去，紲無半錢，厝裡有三个囡仔，誠艱苦。　阮查某人每日提甘蔗去市場賣，一日趁八九百錢咧度日。 

　Tap: Ū oh, put-sî to kā góa thó. 　Góa kui-ê hō͘ i phiàn--khì, sòa bô-pòaⁿ-chîⁿ, chhù ni̍h ū saⁿ-ê gín-á, chiâⁿ kan-khó͘. 　Gún cha-bó͘-lâng múi-ji̍t the̍h kam-chià khì chhī-tiûⁿ bōe, chi̍t-ji̍t thàn peh-káu-pah-chîⁿ teh tō͘-ji̍t. 

　問：按呢你真正毋願，才想欲共害死，彼間藥店共討轉來，著毋？

　Mn̄g: Án-ni lí chin-chiàⁿ m̄-goān, chiah siūⁿ-beh kā hāi--sí, hit-keng io̍h-tiàm kā thó--tńg-lâi, tio̍h m̄? 

　答：是按呢都著，無，我這腹氣食袂消。

　Tap: Sī án-ni to tio̍h, bô, góa che-pak-khì chia̍h-bōe-siau.

　問：若是按呢，你將害死伊的情形，講予我聽。

　Mn̄g: Nā-sī án-ni, lí chiong hāi-sí i ê chêng-hêng, kóng hō͘ góa thiaⁿ. 

　答：我想欲招伊來阮厝，共刣死，代先準備菜刀囉、草蓆囉，麻索囉。　阮查某人每日𤆬囡仔去市場賣甘蔗，賣甲十二點才有通轉來。　我去鳳山揣孫笠，共講我共阮姊夫借一百箍欲還伊，叫伊某日來阮兜提。　彼日伊來阮兜，我騙伊講：較慢，阮姊夫會提來。　叫伊去樓頂等咧。　伊𬦰起樓頂，倒咧總舖，紲睏去。我才攑菜刀對伊的頷頸共刣兩个，伊一下就死去。　我用草蓆包，用索仔共捆，夯去埤仔共㧒落去。　猶我提伊的印仔，叫代書寫彼間藥店的讓渡證，對郵便寄去予𪜶查某人。　我去共講：恁翁閣讓渡予我，已經拍約字，叫伊趕緊予我。　伊信信歡喜，將彼間家私、藥品，一切交我。　我閣走去嘉義拜託人寫一張批，寫𪜶翁的名寄去予𪜶某，騙伊講：伊欲去內地辦貨，叫伊免煩惱。　我閣轉去鳳山蹛彼間，賣藥十數日，予恁大人來掠我。

　Tap: Góa siūⁿ-beh chio i lâi gún chhù, kā thâi--sí, tāi-seng chún-pī chhài-to lo͘h, chháu-chhio̍h lo͘h, môa-soh lo͘h. 　Gún cha-bó͘-lâng múi-ji̍t chhōa gín-á khì chhī-tiûⁿ bōe kam-chià, bōe kah cha̍p-jī tiám chiah ū-thang tńg--lâi. 　Góa khì Hōng-soaⁿ chhōe Sun Li̍p, kā kóng góa kā gún chí-hu chioh chi̍t-pah-kho͘ beh hêng--i, kiò i bó͘-ji̍t lâi gún-tau the̍h. 　 Hit-ji̍t i lâi gún-tau, góa phiàn i kóng: Khah bān, gún chí-hu ōe the̍h--lâi. 　Kiò i khì lâu-téng tán leh. 　I peh-khí lâu-téng, tó teh chóng-phò͘, sòa khùn--khì. Góa chiah gia̍h chhài-to tùi i ê ām-kún kā thâi nn̄g-ê, i chi̍t-ē chiū sí--khì. 　Góa ēng chháu-chhio̍h pau, ēng soh-á kā khún, giâ khì pi-á kā hiat--lo̍h-khì. 　Iá góa the̍h i ê ìn-á, kiò tāi-su siá hit-keng io̍h-tiàm ê jiōng-tō͘-chèng, tùi iû-piān kià khì hō͘ in cha-bó͘-lâng. 　Góa khì kā kóng: Lín ang koh jiōng-tō͘ hō͘--góa, í-keng phah-iok-jī, kiò i kóaⁿ-kín hō͘--góa. 　I sìn-sìn hoaⁿ-hí, chiong hit-keng ke-si, io̍h-phín, it-chhè kau--góa. Góa koh cháu khì Ka-gī pài-thok lâng siá chi̍t-tiuⁿ phoe, siá in ang ê miâ kià khì hō͘ in bó͘, phiàn i kóng: I beh khì Lōe-tē pān-hòe, kiò i bián-hoân-ló. 　Góa koh tńg-khì Hōng-soaⁿ tòa hit-keng, bōe-io̍h cha̍p-sò͘-ji̍t, hō͘ lín tāi-jîn lâi lia̍h--góa. 

　問：你創這款的代誌，這馬你心肝想按怎？

　Mn̄g: Lí chhòng chit-khoán ê tāi-chì, chit-má lí sim-koaⁿ siūⁿ án-chóaⁿ? 

　答：孫笠偏我真忝，食甲夠，致出予我刣死，我這馬滿心肝真歡喜，敨一腹氣。　

　Tap: Sun Li̍p phiⁿ góa chin thiám, chia̍h-kah-kàu, tì-chhut hō͘ góa thâi--sí, góa chit-má móa-sim-koaⁿ chin hoaⁿ-hí, tháu-chi̍t-pak-khì.