成語集 SÊNG-GÚ CHI̍P
著者：林祥雲 Lîm Siông-hûn
編輯者、印刷者、發行者：Rev. Andrew B. Nielson, M.A. （Liâm Tek-lia̍t Bo̍k-su 廉德烈牧師）
印刷所、發行所：臺南新樓冊房 Tâi-lâm Sin-lâu Chheh-pâng
昭和三年一月十七日印刷
昭和三年一月二十日發行
昭和三年 1928
PDF https://online.pubhtml5.com/zhwle/vfqa/
白話字書 · Sêng-gú chìp · 國立臺灣大學圖書館數位典藏館
Thâu-sū
頭序
Giân-gú chit hāng, hoān-ûi chin khoah, ta̍k só͘-chāi ta̍k sî to ū teh ke-thiⁿ. Nā ū khah gâu ê lâng só͘ kóng ê hó ōe, chiū liû-thoân chòe Sêng-gú; koh sui-jiân sī chho͘-sio̍k ê lâng, nā só͘ kóng ê ōe ū hó ì-sù thang kà-sī lâng, iā tāi-tāi liû-thoân chòe Sio̍k-gú, bô hòe-sak--khì. Só͘-í kìⁿ-nā ū ài beh thiah-bêng ê tāi-chì, khòaⁿ kap toh-lo̍h chi̍t kù ê Sêng-gú á Sio̍k-gú sio-ha̍h, chiū the̍h hit-kù khí-lâi kóng, lâng thiaⁿ-liáu sim-lāi sûi-sî bêng-pe̍k. Só͘-í ta̍k-kok bô-m̄ ū in ê thó͘-khiuⁿ, hit-hō Sêng-gú kap Sio̍k-gú tī-teh.
言語這項，範圍真闊，逐所在逐時都有咧加添。若有較𠢕的人所講的好話，就流傳做成語；閣雖然是粗俗的人，若所講的話有好意思通教示人，也代代流傳做俗語，無廢捒去。所以見若有愛欲拆明的代誌，看佮佗落一句的成語抑俗語相合，就提彼句起來講，人聽了心內隨時明白。所以逐國無毋有𪜶的土腔，彼號成語佮俗語佇咧。
Kūn-lâi sî-sè piàn-chhian, chheng-liân ê lâm-lú, choan tùi-tiōng Au-bûn, Hô-bûn, só͘-í tùi kó͘-chá liû-thoân ê Sêng-gú, Sio̍k-gú, chiām-chiām hòe--khì, bô ēng. Sin-chìn ê siàu-liân khah-chōe m̄-bat ēng, iā bōe hiáu-tit hit-ê ì-sù.
近來時勢變遷，青年的男女，專對重歐文、和文，所以對古早流傳的成語、俗語，漸漸廢去、無用。新進的少年較濟毋捌用，也袂曉得彼个意思。
Chit kūn-ji̍t Liâm Tek-lia̍t Bo̍k-su (Rev. Andrew B. Nielson, M.A.) in-ūi beh tńg-khì Eng-kok, teh khoán hêng-lí ê sî, hut-jiân chhē-chhut jī-cha̍p nî chêng, í-keng kè-óng hit ê Lîm Siông-hûn Sian-siⁿ só͘ siá ê Sêng-gú kap Sio̍k-gú pah-gōa tiâu. Khòaⁿ-liáu m̄-kam hòe-sak, só͘-í tiām-chîⁿ lo̍h-khì ìn-chiâⁿ chi̍t ê sòe-pún chheh, ēng án-ni lâi chòe kì-liām i chá-sî ê Sian-siⁿ lah.
這近日廉德烈牧師（Rev. Andrew B. Nielson, M.A.）因為欲轉去英國，咧款行李的時，忽然揣出二十年前，已經過往彼个林祥雲先生所寫的成語佮俗語百外條。看了毋甘廢捒，所以墊錢落去印成一个細本冊，用按呢來做紀念伊早時的先生啦。
Chit pún chheh só͘ chi̍p chí-ū pah-gōa tiâu, chhin-chhiūⁿ bōe-bián-tit chin sió-khóa. Pún ài ke-thiⁿ tām-po̍h hō͘ i khah chiâu-pī; m̄-kú in-ūi ài pó-chûn Siông-hûn Sian-siⁿ ê ûi-kó, chiah bô kā i thiam-siah, chiong goân-kó ê gia̍h ìn-soat lâi hoat-hêng. Kî-tiong nā-sī Sêng-gú, chiū tī thâu-á ìn chi̍t ê * (asterisk) lâi chò hō; nā bô--ê, chiū-sī Sio̍k-gú. Góa siūⁿ khòaⁿ ê lâng, chōe-chió tek-khak ū tit-tio̍h lī-ek.
這本冊所集只有百外條，親像袂免得真小可。本愛加添淡薄予伊較齊備；毋過因為愛保存祥雲先生的遺稿，才無共伊添削，將原稿的額印刷來發行。其中若是成語，就佇頭仔印一个 *（asterisk）來做號；若無的，就是俗語。我想看的人，濟少的確有得著利益。
1928 nî 1 ge̍h 12 ji̍t,
一九二八年正月十二日
Tân Iân-lêng kì.
陳延齡記
1. Phō bâ bōe kā chhú, ah ke m̄ chiâⁿ pū.
Lia̍h niau, niau bōe kā niáu-chhú, ah-chhi̍h ke, ke m̄ chiâⁿ pū ke-nn̄g.
Che sī kóng lâng tio̍h ka-kī beh chòe, nā m̄, sui-bóng pa̍t-lâng bián-kióng ah-chhi̍h--i, iā bô chhái-káng.
1. 抱貓袂咬鼠，押雞毋成孵。
掠貓、貓袂咬鳥鼠，押揤雞，雞毋成孵雞卵。
這是講人著家己欲做，若毋，雖罔別人勉強押揤伊，也無彩工。
2. * Jîn bû hāi hó͘ sim, hó͘ iú siong jîn ì.
Lâng bô chûn hām-hāi hó͘ ê sim-koaⁿ, hó͘ ū khǹg siong-hāi lâng ê ì-sù.
Che sī kóng hó-lâng bô sim-ì beh hāi pháiⁿ-lâng, pháiⁿ-lâng éng-éng chûn-sim beh hāi hó-lâng, só͘-í tio̍h tî-hông.
2. *人無害虎心，虎有傷人意。
人無存陷害虎的心肝，虎有囥傷害人的意思。
這是講好人無心意欲害歹人，歹人往往存心欲害好人，所以著持防。
3. Jîn sú liû bêng, hó͘ sú liû phî.
Lâng sí tio̍h lâu miâ-siaⁿ hō͘ lâng liû-thoân, hó͘ nā sí ū lâu i ê phê hō͘ lâng lō͘-ēng.
Che sī kóng, m̄-thang chòe lâng khah m̄-ta̍t-tio̍h cheng-siⁿ.
3. 人死留名，虎死留皮。
人死著留名聲予人流傳，虎若死有留伊的皮予人路用。
這是講，毋通做人較毋值著精牲。
4. Chòe ke tio̍h chhéng, chòe lâng tio̍h péng.
Chhéng, sī chhéng thô͘-soa, khòaⁿ ū sím-mi̍h thâng-thōa thang chia̍h, chòe lâng tio̍h péng-pìⁿ, khòaⁿ ū sím-mi̍h thâu-lō͘ thang chòe.
Che sī kóng, lâng tio̍h kut-la̍t piàn-thong, chhē thâu-lō͘ khì thàn-chia̍h.
4. 做雞著筅，做人著反。
筅，是筅塗沙，看有啥物蟲豸通食，做人著反變，看有啥物頭路通做。
這是講，人著骨力變通，揣頭路去趁食。
5. Chi̍t ô͘ kim-hî, bōe kham-tit chi̍t bé sam-pan nāu.
Sam-pan sī pháiⁿ hî ê miâ, nā pàng lo̍h kim-hî-ô͘, chiū ài jek kim-hî lâi chhá-nāu, tì-kàu hāi kim-hî loān-chhèng-chhèng.
Che sī kóng, chi̍t kûn hó-lâng, bōe kham-tit chi̍t ê pháiⁿ-lâng loān-cha̍p.
5. 一湖金魚，袂堪得一尾三斑鬧。
三班是歹魚的名，若放落金魚湖，就愛逐金魚來吵鬧，致到害金魚亂衝衝。
這是講，一群好人，袂堪得一个歹人亂雜。
◇sam-pan 三斑：fork tailed paradisefish。
6. Poa̍h kiáu ham-khak khí, chòe chha̍t thau-me bí.
Lâng ài poa̍h-kiáu, sī tùi chòe gín-ná ēng ham-khak-chîⁿ poa̍h khí-thâu; chòe chhat--ê, sī tùi thau-me lâng ê bí ná koàn-sì.
Che sī kóng, lâng m̄-thang tùi sió-khóa ê tham-sim, tì-kàu chòe tōa chhò-gō͘.
6. 跋筊蚶殼起，做賊偷搣米。
人愛跋筊，是對做囡仔用蚶殼錢跋起頭；做賊的，是對偷搣人的米那慣勢。
這是講，人毋通對小可的貪心，致到做大錯誤。
7. Ah-nn̄g ba̍t-ba̍t, iā ū phāng.
Ah-nn̄g-khak sui-bóng ba̍t-ba̍t, m̄-kú chiò-kng chiū ū khòaⁿ-kìⁿ lāi-bīn ū chi̍t-thâu chi̍t-phāng khang-khang.
Che sī kóng, lâng chòe àm-chīⁿ ê sū, sui-bóng ki-bi̍t, m̄-kú ia̍h ōe chhut-phòa hō͘ lâng chai.
7. 鴨卵密密，也有縫。
鴨卵殼雖罔密密，毋久照光就有看見內面有一頭一縫空空。
這是講，人做暗靜的事，雖罔機密，毋過也會出破予人知。
8. Pe̍h-lēng-si gâu thó-chia̍h, bô kha-āu-tó͘-bah.
Pe̍h-lēng-si sī chiáu-miâ, chin gâu chhē hô͘-sîn, báng-á, thóng khí chia̍h; sui-jiân hiah gâu thó-chia̍h, m̄-kú i ê kha-kut chin sán, lóng bô bah.
Che sī kóng, tham-chia̍h ê lâng chia̍h bōe pûi, tham-sim bô lī-ek.
8. 白翎鷥𠢕討食，無跤後肚肉。
白翎鷥是鳥名，真𠢕揣胡蠅、蠓仔捅起食；雖然遐𠢕討食，毋久伊的跤骨真瘦，攏無肉。
這是講，貪食的人食袂肥，貪心無利益。
9. * Tāi-tiōng-hu it-giân hòng-chhut, sù-má lân tui.
Tōa ê lâm-chú-hàn chi̍t kù ōe nā kóng chhut-chhùi, ēng sì-chiah bé teh thoa ê chhia iā oh-tit tui tò-tńg.
Che sī kóng, kóng-ōe tio̍h kín-sīn; kì-jiân kóng-chhut, oh-tit siu-ji̍p.
9. * 大丈夫一言放出，四馬難追。
大的男子漢一句話若講出喙，用四隻馬咧拖的車也僫得追倒轉。
這是講，講話著謹慎；既然講出，僫得收入。
10. Chhân-hn̂g nā ū siu, chiáu-chiah chia̍h tit lōa.
Siu, sī siu-sêng; chia̍h tit lōa, sī só͘ chia̍h bô lōa-chōe.
Che sī kóng, lâng nā tōa thàn-chîⁿ, m̄-thang khek-po̍k lâi khoán-thāi ke-lāi kap tiàm-lāi ê kha-chhiú; kú in chia̍h kàu pá khiok bô lōa-chōe.
10. 田園若有收，鳥隻食得偌。
收，是收成；食得偌，是所食無偌濟。
這是講，人若大趁錢，毋通刻薄來款待家內佮店內的跤手；詎𪜶食到飽卻無偌濟。
11. * Put ji̍p hó͘-hia̍t, ian tek hó͘-chú?
Nā m̄-káⁿ ji̍p hó͘ ê châu-hia̍t, beh thài ōe tit-tio̍h hó͘-á-kiáⁿ?
Che sī kóng, tû chha̍t tio̍h hó-táⁿ, káⁿ kàu chha̍t-siū khì lia̍h--i, chiah ōe iú-kong. Iū-koh sī pí-phēng pān-sū káⁿ hiòng-chêng khì chhē--lâng, iā sī án-ni.
11. * 不入虎穴，焉得虎子？
若毋敢入虎的巢穴，欲呔會得著虎仔囝？
這是講，除賊著好膽，敢到賊岫去掠伊，才會有功。又閣是比並辦事敢向前去揣人，也是按呢。
12. Iam-ke thàn hōng poe.
Iam-ke sī hā-chiān ê khîm, ia̍h beh thàn kùi-khì ê hōng lâi poe.
Che sī kóng, pîn-chiān--ê bô ka-kī sioh pún-hūn, chia̍h-chhēng kap kiâⁿ-ta̍h, ài thàn hù-kùi lâng ê khoán-sit.
12. 閹雞趁鳳飛。
閹雞是下賤的禽，亦欲趁貴氣的鳳來飛。
這是講，貧賤的無家己惜本份，食穿佮行踏，愛趁富貴人的款式。
這就是講，散赤人毋知影惜家己的本份，食穿跤步，攏愛學好額人的款。
13. * Hô͘ ká hó͘ ui.
Hó͘ tè hô͘-lî teh kiâⁿ, pah-siù kiaⁿ-ùi thòe-pī. Kî-si̍t sī ùi hó͘, m̄-sī ùi hô͘; chāi hô͘-lî éng ài ká-chià hó͘ ê ui-giâm lâi hō͘ lâng kiaⁿ.
Che sī kóng, kan-chà ê lâng, éng ài óa-khò ū sè-thâu ê ok-lâng lâi tián ui-hong.
13. * 狐假虎威。
虎綴狐狸咧行，百獸驚畏退避。其實是畏虎，毋是畏狐；在狐狸永愛假借虎的威嚴來予人驚。
這是講，奸詐的人，永愛倚靠有勢頭的惡人來展威風。
14. Chhian-sǹg bān-sǹg, m̄-ta̍t-tio̍h thiⁿ chi̍t oe̍h.
Chheng-pái lâi sǹg, bān-pái lâi sǹg, m̄-ta̍t-tio̍h thiⁿ chi̍t sǹg.
Che sī kóng, lâng sui-bóng gâu kek-sǹg, ia̍h sī bô lō͘-ēng, in-ūi thian-sò͘ sī it-tēng.
14. 千算萬算，毋值著天一劃。
千擺來算，萬擺來算，毋值著天一算。
這是講，人雖罔𠢕激算，亦是無路用，因為天數是一定。
15. Lâng beh hāi lâng, thiⁿ m̄-khéng; thiⁿ beh hāi lâng tī ba̍k-chêng.
Che sī kóng, lâng beh hām-hāi lâng, Siōng-tè m̄-chún; nā-sī Siōng-tè beh hō͘ lâng sí-sit, khiok-sī tiap-á-kú ba̍k-chiu-chêng ê sū.
15. 人欲害人，天毋肯；天欲害人佇目前。
這是講，人欲陷害人，上帝毋准；若是上帝欲予人死失，卻是霎仔久目睭前的事。
16. Thian piàn it-sî-kan, sìⁿ-miā chāi gán-chiân.
Thiⁿ beh piàn-hòa sī hut-jiân-kan, chhin-chhiūⁿ hong-thai-hō͘, lûi-kong, sih-nà, lo̍h-pha̍uh, tē-tāng hit hō chai-eh; lâng beh sí-sit sī tī ba̍k-chêng ê sū.
16. 天變一時間，性命在眼前。
天欲變化是忽然間，親像風颱雨、雷公、爍爁，落雹，地動彼號災厄；人欲死失是佇目前的事。
17. Ji̍t-chí bōe tò, m̄-sī thiⁿ-tōe bô pò.
Che sī kóng, lâng chòe pháiⁿ, bô tú-tio̍h chai-lān; khiok sī sî-ji̍t iáu-bōe kàu, m̄-sī thiⁿ-tōe bô pò-èng, lâi iông-ún lâng chòe pháiⁿ.
17. 日子袂到，毋是天地無報。
這是講，人做歹，無拄著災難；卻是時日猶未到，毋是天地無報應，來容允人做歹。
18. * Sek-sî-bū--chiá ûi chùn-kia̍t, ti-chìn-thòe--chiá ûi eng-hiông.
Bat hiān-sî iàu-kín--ê, sǹg-sī hô-kia̍t; chai chìn-thòe ê lâng, hō-chòe eng-hiông.
Che sī kóng, tì-sek ê lâng chòe-sū tio̍h khòaⁿ ki-hōe, bōe sái-tit kò͘-chip bián-kióng.
18. * 識時務者為俊傑，知進退者為英雄。
捌現時要緊的，算是豪傑；知進退的人，號做英雄。
這是講，智識的人做事著看機會，袂使得固執勉強。
19. Chòe ok chòe to̍k, khiâ bé kho̍k-kho̍k; hó-sim hó-hēng, bô saⁿ thang chhēng.
Chòe ok-to̍k ê lâng ū thang khiâ bé kho̍k-kho̍k cháu, thit-thô; hó-sim ê lâng sòng-hiong kàu bô chi̍t niá saⁿ thang chhēng.
Che sī kóng, chòe hó hoán-tńg tú-tio̍h kan-khó͘; cho-gū khiok sī bô tiāⁿ-tio̍h.
19. 做惡做毒，騎馬硞硞；好心好行，無衫通穿。
做惡毒的人有通騎馬硞硞走、𨑨迌；好心的人喪傖兇到無一領衫通穿。
這是講，做好反轉拄著艱苦；遭遇卻是無定著。
20. Chn̂g-bat chn̂g-kiaⁿ, pòaⁿ-bat pòaⁿ-kiaⁿ; lóng m̄-bat, lóng m̄-kiaⁿ.
Che sī kóng, lâng nā chiâu-chn̂g bat chêng-lí, chin kiaⁿ-liáu chòe chhò; nā lóng m̄-bat chêng-lí, chiū káⁿ hó-táⁿ lām-sám chòe.
20. 全捌全驚，半捌半驚；攏毋捌，攏毋驚。
這是講，人若齊全捌情理，真驚了做錯；若攏毋捌情理，就敢好膽濫糝做。
21. Kam-pun, ū thang chia̍h, ū thang chhun; thau-ni thau-liàm, chi̍t-sì-lâng kheh-khiàm.
Che sī kóng, lâng nā kam-goān pun hō͘ lâng, hoaⁿ-hí lâi siá-sì, éng-éng chia̍h ū chhun; nā tham-sim thau-the̍h, siông-siông chia̍h bô kàu, só͘-í lâng tio̍h ū tō͘-liōng.
21. 甘食甘分，有通食，有通賰；偷拈偷捻，一世人缺欠。
是講，人若甘願分予人，歡喜來捨施，往往食有賰；若貪心偷提，常常食無夠，所以人著有度量。
22. * Oa̍t kan, oa̍t khiáu, oa̍t pîn-kiông; kan-kan khiáu-khiáu thian put-iông.
Ná kan-khiáu chiū ná pîn-kiông, kan-khiáu ê lâng, thiⁿ m̄ iông-ún--i.
Che sī kóng, lâng tio̍h tiong-hō͘, chiah ū hok-khì.
22. * 越奸，越巧，越貧窮；奸奸巧巧天不容。
那奸巧就那貧窮，奸巧的人，天毋容允伊。
這是講，人著忠厚，才有福氣。
23. Chiūⁿ tah, m̄ pê; bô chiūⁿ tah, khàng kàu lâu huih.
Chiūⁿ ê só͘-chāi m̄ pê, bô chiūⁿ ê só͘-chāi ti̍t-ti̍t pê kàu lâu huih.
Che sī kóng, lâng eng-kai chhut-la̍t--ê m̄ khì chòe, m̄ eng-kai chhut-la̍t--ê hoán-tńg chīn-la̍t khì chòe, tì-kàu ū sún-hāi bô lī-ek.
23. 癢搭，毋扒；無癢搭，控到流血。
癢的所在毋扒，無癢的所在直直扒到流血。
這是講，人應該出力的毋去做，毋應該出力的反轉盡力去做，致到有損害無利益。
24. * Sī ngô͘ châi, ka-kī lâi; sī ngô͘ chú, táⁿ put sú.
Nā-sī lán eng-kai tit ê chîⁿ, chiū bián tô͘-bô͘, iā ka-kī kàu chhiú; nā-sī eng-kai tit ê kiáⁿ, sui-bóng phah, ia̍h bōe sí.
Che sī kóng, chîⁿ-châi m̄-bián kè-kàu, kiáⁿ-jî chóng tio̍h kà-sī.
24. * 是吾財，家己來；是吾子，打不死。
若是咱應該得的錢，就免圖謀，也家己到手；若是應該得的囝，雖罔拍，亦未死。
這是講，錢財毋免計較，囝兒總著教示。
25. Chia̍h-hiong khùn tiōng, chòe khang-khè bô lō͘-iōng.
Chia̍h mi̍h chhiⁿ-hiong, khùn ài tùi-tiōng; lūn-kàu chòe kang, pîn-tōaⁿ kòa hâm-bān, ta̍k hāng bô lō͘-ēng.
25. 食凶睏重，做工課無路用。
食物生凶，睏愛對重；論到做工，貧惰掛含慢，逐項無路用。
26. Mî-chioh-phē m̄-khùn, beh khì ô-khak chhia-pùn-táu.
Mî-chioh-phē sio kòa nńg, i kú m̄ khì khùn, ô-khak tiam kòa ngī, i kú ài beh khì chhia-pùn-táu.
Che sī kóng, lâng bē-hiáu kiû an-ún, tian-tò khì chiū-kūn kan-khó͘.
26. 棉襀被毋睏，欲去蚵殼捙畚斗。
棉襀被燒掛軟，伊詎毋去睏，蚵殼砧掛硬，伊閣愛欲去捙畚斗。
這是講，人袂曉求安穩，顛倒去就近艱苦。
27. * Kūn chu--chiá chhek, kūn be̍k--chiá hek.
Kūn-óa gîn-chu ê mi̍h ōe piàn chhiah-sek, kūn-óa o͘-ba̍k ê mi̍h pìⁿ chòe o͘-sek.
Che sī kóng, chiū-kūn hó-lâng ōe pìⁿ hó, chhin-kūn pháiⁿ-lâng ōe pìⁿ pháiⁿ; chhin-chhiūⁿ óa hit hāng mi̍h, chiū bak hit hō sek.
27. * 近朱者赤，近墨者黑。
近倚銀朱的物會變赤色，近倚烏墨的物變做烏色。
這是講，就近好人會變好，親近歹人會變歹；親像倚彼項物，就沐彼號色。
28. Chêng-niá bōe sī kiā, āu-niá khah kiā piah.
Chêng-bīn ê soaⁿ-niá iáu bē sǹg sī kiā, āu-bīn ê soaⁿ-niá koh-khah kiā.
Che sī kóng, ba̍k-chêng ê kéng-hóng sū-sè, bô lōa gûi-hiám oh-kiâⁿ, ba̍k-āu ê sū-sè koh-khah kan-khó͘ tam-tng.
28. 前嶺袂是崎，後領較崎壁。
前面的山嶺猶未算是崎，後面的山嶺閣較崎。
這是講，目前的景況事勢，無偌危險僫行，目後的事勢閣較艱苦擔當。
29. * Jîn put-soat put-ti, kó͘ put-táⁿ put-hiáng.
Lâng nā bô kóng, chiū bô lâng chai; kó͘ nā bô phah, chiū bōe-ōe tân.
Che sī kóng, ū sím-mi̍h tāi-chì chóng tio̍h chhut-siaⁿ kóng-bêng; nā tìⁿ-tiām-tiām beh thài ū lâng chai?
29. * 人不說不知，鼓不打不響。
人若無講，就無人知；鼓若無拍，就袂會霆。
這是講，有啥物代誌總著出聲講明；若佯恬恬欲呔有人知？
30. Sian--lâng phah-kó͘ ū-sî chhò.
Sîn-sian phah-kó͘, ia̍h ū-sî ū chhò-gō͘.
Che sī kóng, lâng sui-bóng gâu, chòe tāi-chì bōe bián-tit ū-sî sit-chhò, só͘-í tì-sek ê lâng m̄-káⁿ khoa-kháu i lóng bô kè-sit, lóng bô m̄-tio̍h.
30. 仙人拍鼓有時錯。
神仙拍鼓，亦有時有錯誤。
這是講，人雖罔𠢕，做代誌袂免得有時失錯，所以智識的人毋敢誇口伊攏無過失，攏無毋著。
31. * Jîn iú siān-goān, thian pit chiông--chi.
Lâng ū hó ê sim-goān, thiⁿ tek-khak thàn--i.
Che sī kóng, lâng nā ū hó sim-goān, chiū Siōng-tè tek-khak hō͘ i chiâⁿ.
31. * 人有善願，天必從之。
人有好的心願，天的確趁伊。
這是講，人若有好心願，就上帝的確予伊成。
32. * Put í ngó͘ ûi-tek, hoán í ngó͘ ûi-siû.
M̄ lia̍h góa chòe un-tek, hoán-tńg lia̍h góa chòe oan-siû.
Che sī chhin-chhiūⁿ lâng thiaⁿ tō-lí bô kám-un, hoán-tńg chòe tùi-te̍k, saⁿ khún-tio̍k.
32. * 不以我為德，反以我為仇。
毋掠我做恩德，反轉掠我做冤仇。
這是親像人聽道理無感恩，反轉做對敵，相窘逐。
33. Hó-chéng m̄ tn̂g, pháiⁿ-chéng m̄ tn̄g.
Hó ê chéng-chí m̄ kú-tn̂g, pháiⁿ ê chéng-cho̍k bōe choa̍t-tn̄g.
Che sī kóng, hó ê pē-bú bô tn̂g-tn̂g chhut hó kiáⁿ-sun, pháiⁿ chó͘-kong éng ài chhut pháiⁿ kiáⁿ-sun; koh kiáⁿ-sun éng m̄ o̍h pē-kong ê hó-khoán, éng ài o̍h i ê pháiⁿ-iūⁿ.
33. 好種毋長，歹種毋斷。
好的種子毋久長，歹的種族袂絕斷。
這是講，好的爸母無長長出好囝孫，歹祖公永愛出歹囝孫；閣囝孫永毋學爸公的好款，永愛學伊的歹樣。
34. Chi̍t sî hong sái chi̍t sî chûn.
Hit-chi̍t-sî ê hong-bīn, tú-hó ōe ēng-tit sái hit-chi̍t-sî ê chûn-chiah.
Che sī kóng, lâng teh pān-sū, tio̍h siòng ki-hōe, tio̍h sek-sî-bū; bōe sái-tit kò͘-chip éng-siông-sî ê khoán; bōe chòe-tit, chiū tio̍h thèng-hāu.
34. 一時風駛一時船。
彼一時的風面，拄好會用得駛彼一時的船隻。
這是講，人咧辦事，著相機會，著識時務；袂使得固執往常時的款；袂做得，就著聽候。
35. Chi̍t-pah lún, chiah ū kim-tún.
Kó͘-chá lâng bat ū lâng thun-lún chi̍t-pah-kòe, chiū tit-tio̍h chi̍t ê kim-tún-á.
Che sī kóng, lâng tio̍h siông-siông thun-lún chiah ū hok-khì.
35. 一百忍，才有金盾。
古早人捌有人吞忍一百過，就得著一个金盾仔。
這是講，人著常常吞忍才有福氣。
36. * Sin--ni̍h bû siâ, put phàⁿ kúi.
Seng-khu nā bô siâ-phiah ê sū, chiū m̄-kiaⁿ kúi-koài.
Che sī kóng, lâng kui chèng-tō, thàn chin-lí, sim chiū an-jiân bô kiaⁿ, chiah bōe siū Mô͘-kúi ê bê-he̍k.
36. * 身裡無邪，不怕鬼。
身軀若無邪癖的事，就毋驚鬼怪。
這是講，人歸正道，趁真理，心就安然無驚，才袂受魔鬼的迷惑。
37. Ín kúi ji̍p-the̍h, chhiáⁿ kúi i-pīⁿ.
Lâng nā phòa-pīⁿ, chiū sio-hiuⁿ khì mn̂g-kháu hē kúi-sîn.
Che sī kóng, ín-chhōa kúi ji̍p chhù-the̍h, chhiáⁿ kúi lâi i-pīⁿ, sī iú-sún bû-ek ê sū.
37. 引鬼入宅，請鬼醫病。
人若破病，就燒香去門口下鬼神。
這是講，引𤆬鬼入厝宅，請鬼來醫病，是有損無益的事。
38. Pháiⁿ koe kāu chí, pháiⁿ lâng kāu giân-gí.
Pháiⁿ ê koe chōe-chōe koe-chí, pháiⁿ ê lâng chōe-chōe ōe.
Che sī kóng, lâng tio̍h eng-kai kóng, chiah kóng; m̄-thang to-giân, tì-kàu chòe chhò-gō͘.
38. 歹瓜厚子，歹人厚言語。
歹的瓜濟濟瓜子，歹的人濟濟話。
這是講，人著應該講才講；毋通多言，致到做錯誤。
39. * Chū hūn ki bû ia̍p, bo̍k oàn thài-iông phian.
Tio̍h ka-kī hūn chhiū-ki bōe hoat-hio̍h; bo̍h-tit oàn-hūn ji̍t-thâu chiò phian-piⁿ.
Che sī kóng, lâng tio̍h hūn ka-kī bōe hoat-ta̍t heng-khí; m̄-thang oàn-hūn pa̍t lâng bô chiàu-kò͘ khan-sêng.
39. * 自恨枝無葉，莫怨太陽偏。
著家己恨樹枝袂發葉；莫得怨恨日頭照偏邊。
這是講，人著恨家己袂發達興起；毋通怨恨別人無照顧牽成。
40. Chia̍h ké-chí bô pài chhiū-thâu.
Lâng chai thang chia̍h ké-chí, chóng-sī bô khì pài-siā ké-chí ê chhiū-thâu.
Che sī kóng, lâng siū lâng ê un-hūi, iā bōe-hiáu tap-siā--i; koh m̄-bat bān-hāng mi̍h tùi Siōng-tè chhut, m̄-chai thang ho̍k-sāi Siōng-tè.
40. 食果子無拜樹頭。
人知通食果子，總是無去拜謝果子的樹頭。
這是講，人受人的恩惠，也袂曉答謝伊；閣毋捌萬項物對上帝出，毋知通服侍上帝。
41. Môa siⁿ-lâng ba̍k, tap sí-lâng un.
Môa-phiàn oa̍h-lâng ê ba̍k-chiu, hō-chòe pò-tap sí-lâng ê un-chêng.
Tùi chit kù sio̍k-gú khó-kiàn lâng ōe-hiáu-tit chòe kong-tek sī bô iáⁿ, bô thang lī-ek sí-lâng, put-kò sī ài thàn sè-sio̍k nā-tiāⁿ.
41. 瞞生人目，答死人恩。
瞞騙活人的目睭，號做報答死人的恩情。
對這句俗語可見人會曉得做功德是無影，無通利益死人，不過是愛趁世俗但定。
42. Ū-sî chheⁿ kng, ū-sî ge̍h kng, ū-sî chhì-nâ-pô͘ kng.
Chhì-nâ-pô͘ sī chhì-phè nâ-tâu, in-ūi hé-kim-chhiⁿ siông-siông hioh tī hit-ni̍h, só͘-í ū kng.
Che sī kóng, lâng ê êng-hián bô tiāⁿ-tio̍h; ū-sî chit-ê êng-kng, ū-sî hit-ê êng-kng, m̄-thang ba̍uh-soah--i.
42. 有時星光，有時月光，有時刺林苞光。
刺林苞是刺帕林投，因為火金星常常歇佇彼裡，所以有光。
這是講，人的榮顯無定著；有時這个榮光，有時彼个榮光，毋通藐煞伊。
43. Sēng ti giâ-chàu, sēng kiáⁿ put-hàu, sēng bó͘ chhá-nāu.
Che sī kóng, lâng tio̍h gâu iok-sok ke-lāi, gâu chek-tok sī-sè, nā théng-sēng--in, chiū ōe hō͘ in chòe sit-chhò khí kiáu-jiáu. Chòe thâu-lâng--ê iā tio̍h iok-sok kha-chhiú, m̄-thang chhut-chāi in.
43. 倖豬夯灶，倖囝不孝，倖某吵鬧。
這是講，人著𠢕約束家內，𠢕責督序細，若寵倖𪜶，就會予𪜶做失錯起攪擾。做頭人的也著約束跤手，毋通出在𪜶。
44. Kau koaⁿ kêng, kau kúi sí, kau ū-chîⁿ-lâng chòe bé-chí.
Kau-pôe koaⁿ-hú ōe liáu-chîⁿ, kau-pôe siâ-kúi ōe sí sit, kau ū-chîⁿ-lâng tio̍h hō͘ i chhe-ēng, chhin-chhiūⁿ chòe in ê bé-chí (lô͘-châi).
Che sī kóng, lâng m̄-thang óa-khò sè-thâu, m̄-thang chhin-kūn siâ-su̍t.
44. 交官窮，交鬼死，交有錢人做馬子。
交陪官府會了錢，交陪邪鬼會死失，交有錢人著予伊差用，親像做𪜶的馬子（奴才）。
這是講，人毋通倚靠勢頭，毋通親近邪術。
45. Kín pháng, bô hó se; kín chek, bô hó tē; kín kè, bô hó ta-ke.
Se sī se-sòaⁿ; tē sī pháng-tē, môa-tē; kè, sī kè-ang.
Che sī kóng, chòe tāi-chì m̄-thang chhiⁿ-kông kín-kip, tio̍h sòe-jī chim-chiok; nā bô, só͘ chòe--ê éng khah m̄-hó.
45. 緊紡，無好紗；緊績，無好苧；緊嫁，無好大家。
紗是紗線；苧是紡苧、麻苧；嫁，是嫁翁。
這是講，做代誌毋通生狂緊急，著細膩斟酌；若無，所做的永較毋好。
46. Hē lí than, hē lí ô; hē kàu-sî, pòaⁿ-hāng bô.
Hē sī iok beh hō͘--lâng, chhin-chhiūⁿ hē pu̍t ê khoán. Than kap ô sī chúi--ni̍h ê mi̍h, chin hó-chia̍h.
Che sī kóng, lâng ēng hó-chhùi lâi phiàn--lâng, kàu-sî chiū ta̍k-hāng bô-iáⁿ.
46. 下你蟶，下你蚵；下到時，半項無。
下是約欲予人，親像下佛的款。蟶佮蚵是水裡的物，真好食。
這是講，人用好喙來騙人，到時就逐項無影。
47. Lâng gâu m̄-ta̍t-tio̍h thiⁿ-tē chòe tùi-thâu.
Lâng sui-bóng gâu kè-bô͘, chóng-sī Siōng-tè m̄-chún--i, chhin-chhiūⁿ kap i chòe tùi-te̍k.
Che sī kóng, lâng sui-jiân ū tì-sek, kok-sū bōe ûi-ke̍h tit Siōng-tè.
47. 人𠢕毋值著天地做對頭。
人雖罔𠢕計謀，總是上帝毋准伊，親像佮伊做對敵。
這是講，人雖然有智識，各事袂違扴得上帝。
48. Tâng gê-chô, thih chhùi-khí; sí ku chìⁿ kàu chiâⁿ oa̍h-pih.
Gê-chô chhin-chhiūⁿ tâng--ê, chhùi-khí chhin-chhiūⁿ thih--ê; bêng-bêng sī sí ê ku i chiū chìⁿ kàu chiâⁿ oa̍h ê pih.
Che sī kóng, lâng ngī-chhùi beh chìⁿ kàu iâⁿ.
48. 銅牙槽，鐵喙齒；死龜諍到成活鱉。
牙槽親像銅的，喙齒親像鐵的；明明是死的龜伊就諍到成活的鱉。
這是講，人硬喙欲諍到贏。
49. Siàu-liân m̄-bat siūⁿ, lāu chiū bô lāu-siùⁿ.
Siàu-liân ê sî nā m̄-bat siūⁿ, kiám-chhái khì hòng-lōng; kàu lāu hit-sî chiū lám sin-miā, siū kan-khó͘, hō-chòe 'bô lāu-siùⁿ'.
49. 少年毋捌想，老就無老相。
少年的時若毋捌想，檢采去放浪；到老彼時就荏身命，受艱苦，號做「無老相」。
50. Chiūⁿ-soaⁿ khòaⁿ soaⁿ-sì; ji̍p-mn̂g khòaⁿ lâng-ì.
Chiūⁿ-soaⁿ tio̍h khòaⁿ soaⁿ ê sè-bīn, ji̍p lâng ê ke, tio̍h khòaⁿ lâng ê ì-sù.
Che sī kóng, lâng chhut-ji̍p lóng tio̍h ū ki-koan kiàn-sek, chiàⁿ bōe sit-chhò.
50. 上山看山勢；入門看人意。
上山著看山的勢面，入人的家，著看人的意思。
這是講，人出入攏著有機關見識，正袂失錯。
有機關見識＝有變竅的能力。
51. Chhiū-sin khiā-tit chiàⁿ, m̄-kiaⁿ chhiū-bé iô-hong.
Chhiū-châng nā khiā-chāi sì-chiàⁿ, chiū m̄-kiaⁿ chhiū-bé ū hong lâi iô-tāng.
Che sī kóng, lâng nā ka-kī chèng-khì khiā-chāi, chiū m̄-kiaⁿ pa̍t-lâng húi-pòng hong-siaⁿ.
51. 樹身徛得正，毋驚樹尾搖風。
樹欉若徛在四正，就毋驚樹尾有風來搖動。
這是講，人若家己正氣徛在，就毋驚別人誹謗風聲。
52. Chi̍t-lâng chú-tiuⁿ, m̄-ta̍t-tio̍h nn̄g-lâng su-niû.
Chi̍t-lâng chú-ì, m̄-ta̍t-tio̍h nn̄g-lâng lâi chham-siông khah-hó.
Che sī kóng, pān chhìn-chhái sū m̄-thang khò ka-kī lâi chū-choan.
52. 一人主張，毋值著兩人思量。
一人主意，毋值著兩人來參詳較好。
這是講，辦凊彩事毋通靠家己來自專。
53. Hāi-jîn chek hāi-kí, hāi pa̍t-lâng ka-kī sí.
Hām-hāi pa̍t-lâng chiū-sī hāi-tio̍h ka-kī.
Che sī kóng, lâng m̄-thang kè-bô͘ hāi pa̍t-lâng, kàu-bé ōe ka-kī siū hāi khì sí.
53. 害人即害己，害別人家己死。
陷害別人就是害著家己。
這是講，人毋通計謀害別人，到尾會家己受害去死。
54. Ka-kī chhia, bē tian; ka-kī o, bē chhàu-hé-lo.
Chhia, sī e sak; tian, sī tian-tó; "o" -- jī ū sam-koan lióng-ì, iā beh chí "o-ló," iā beh "chian-chú," chhin-chhiūⁿ hē tī tiáⁿ--ni̍h teh o.
Che sī kóng, lâng ka-kī hiâm bô sím-mi̍h pháiⁿ; ka-kī o-ló, lóng bōe kiàn-siàu kóng kàu hó-bī hó-sò͘.
54. 家己車，袂顛；家己「O」（爊、呵），袂臭火烙。
車，是挨捒；顛，是顛倒；「O」字有三關兩意，也欲指「呵咾」，也欲「煎煮」，親像下佇鼎裡咧爊。
這是講，人家己嫌無啥物歹；家己呵咾，攏袂見笑講到好味好素。
◇爊：溫燒；燒肉、糋肉的意思。爊，煨也。《集韻》爊、煨：冷去的菜下落鍋裡閣煮燒。菜爊予伊燒。《台日》
◇烙：烙lo̍k。chhàu hé-lo[hè-lo], chhàu hé lo-bī, chhàu-lo, chhàu tiáⁿ-lo.臭火烙、臭火烙味、臭烙、臭鼎烙。
◇味素，就是氣味的意思。《甘》
55. Thó͘-sông m̄-bat pó, lia̍h sam-nāi chòe kiuⁿ-bú.
'Thó͘-sông' sī gōng; 'pó' sī pó-pòe; 'sam-nāi' sī ta̍t chîⁿ ê io̍h, khoán-sit lio̍h-á chhin-chhiūⁿ kiuⁿ-bú. (Kiuⁿ-bú sī chho͘-sio̍k ê mi̍h).
Che sī kóng, lâng bōe-hiáu hun-pia̍t hó-pháiⁿ, chhin-chhiūⁿ lâng lia̍h Siōng-tè ê chin-lí khòaⁿ-chòe īⁿ-toan siâ-kàu.
55. 土倯毋捌寶，掠三奈做薑母。
「土倯」是戇；「寶」是寶貝；「三奈」是值錢的藥，款式略仔親像薑母。（薑母是粗俗的物）。
這是講，人袂曉分別好歹，親像人掠上帝的真理看做異端邪教。
56. * Hù-kùi su îm-io̍k, pîn-kiông khí tō-sim.
Lâng nā hù-kùi, chiū ài siūⁿ kan-îm ê lō͘; lâng nā pîn-kiông, chiū siⁿ-khí thau-the̍h ê sim.
Che sī kóng, lâng nā bô siú tō-lí, put-lūn hù-kùi pîn-kiông, lóng ū su-io̍k lâi liân-lūi i ê sim-chì.
56. * 富貴思淫慾，貧窮起盜心。
人若富貴，就愛想姦淫的路；人若貧窮，就生起偷提的心。
這是講，人若無守道理，不論富貴貧窮，攏有私慾來連累伊的心志。
57. * Jîn siān pī jîn khi, má siān pī jîn khî.
Lâng nā hó, chiū hō͘ lâng khi-hū; bé nā koai, chiū lâng khah ài khiâ.
Che sī kóng, chòe-hó ê lâng bōe-bián-tit siū lâng chiau-that, in-ūi i gâu thun-lún, m̄ ài kap lâng kè-kàu.
57. * 人善被人欺，馬善被人騎。
人若好，就予人欺負；馬若乖，就人較愛騎。
這是講，做好的人袂免得受人蹧躂，因為伊𠢕吞忍，毋愛佮人計較。
58. * Lō͘ iâu ti má-le̍k, sū kiú kiàn jîn-sim.
Lō͘-tô͘ nā hn̄g, chiah chai hit chiah bé ê khùi-la̍t; tāi-chì kàu kú, chiah chai hit-ê lâng ê sim-koaⁿ.
Che sī kóng lâng ê hó-pháiⁿ, m̄-sī chiām-sî-kú khòaⁿ ē-tit chhut.
Che sī kóng lâng ê hó-pháiⁿ, m̄-sī chiām-sî-kú khòaⁿ ē-tit chhut.
58. * 路遙知馬力，事久見人心。
路途若遠，才知彼隻馬的氣力；代誌到久，才知彼个人的心肝。
這是講人的好歹，毋是暫時久看會得出。
59. Iau-ke m̄ sioh chhê, iau-lâng m̄ sioh bīn-phê.
Ke nā iau, m̄-kiaⁿ tek-chhê phah-kóaⁿ; lâng nā iau, m̄-chai thé-biān kiàn-siàu.
Che sī kóng, lâng tio̍h kut-la̍t thàn-chia̍h; nā bô, kàu iau-gō͘ hit-sî, chiū bô kò͘ lián-biān, bô sioh liâm-thí.
59. 枵雞毋惜箠，枵人毋惜面皮。
雞若枵，毋驚竹箠拍趕；人若枵，毋知體面見笑。
這是講，人著骨力趁食；若無，到枵餓彼時，就無顧臉面，無惜廉恥。
60. Tōa-káu pôaⁿ chhiûⁿ, sè-káu khòaⁿ-iūⁿ.
Tōa-chiah káu pôaⁿ-kè chhiûⁿ-á, káu-á chiū khòaⁿ i-ê iūⁿ tè i pôaⁿ.
Che sī kóng, chòe lâng ê sī-tōa m̄-thang pháiⁿ bô͘-iūⁿ hō͘ sī-sè khòaⁿ, kiaⁿ-liáu teh beh o̍h--i.
60. 大狗盤牆，細狗看樣。
大隻狗盤過牆仔，狗仔就看伊的樣綴伊盤。
這是講，做人的序大毋通歹模樣予序細看，驚了咧欲學伊。
61. * Chin-kim put-phàⁿ hé, tiong-sîn put-phàⁿ sú.
Chin-chiàⁿ ê kim m̄-kiaⁿ hé sio; chīn-tiong ê jîn-sîn m̄-kiaⁿ sí.
Che sī kóng, lâng sêng-si̍t chīn-tiong, tú-tio̍h gûi-hiám chai-lān, chiū an-sim khiā-chāi lóng bô kiaⁿ-hiâⁿ, bōe siū bê-hek.
61. * 真金不怕火，忠臣不怕死。
真正的金毋驚火燒；盡忠的人臣毋驚死。
這是講，人誠實盡忠，拄著危險災難，就安心徛在攏無驚惶，袂受迷惑。
62. * Ōa hó͘, ōa phî, lân ōa kut; ti jîn, ti biān, put ti sim.
Ōe hó͘ kan-ta ōe phê, oh-tit ōe kut; chai lâng put-kò chai bīn, khiok m̄-chai sim.
Che sī kóng, bat lâng kan-ta bat i ê gōa-māu, kú bē bêng-bêng chai i ê sim-lāi.
62. * 畫虎，畫皮、難畫骨；知人、知面，不知心。
畫虎干焦畫皮，僫得畫骨；知人不過知面，卻毋知心。
這是講，捌人干焦捌伊的外貌，詎袂明明知伊的心內。
◇畫：ua7 / uā / oā/ 瓜七英（漳）。
63. * Lâng bô chhian ji̍t hó, hoe bô pah ji̍t âng.
Lâng bô-thang chi̍t-chheng ji̍t lóng hó-hó bô pīⁿ-thiàⁿ, hoe bô chi̍t-pah ji̍t lóng âng-âng bô sit-sek.
Che sī kóng, lâng bē bián-tit ū-sî tú-tio̍h kan-khó͘.
63. * 人無千日好，花無百日紅。
人無通一千日攏好好無病疼，花無一百日攏紅紅無失色。
這是講，人袂免得有時拄著艱苦。
64. * Jîn bû kan-khó͘ kè, lân-tek sè-kan châi.
Lâng bô kan-khó͘ ê kè-bô͘, oh tit-tio̍h sè-kan ê chîⁿ-châi.
Che sī kóng, lâng tio̍h chīn pún-hūn lâi chòe-kang, m̄-thang tham chheng-êng, m̄-thang siūⁿ pîn-tōaⁿ.
64. * 人無艱苦計，難得世間財。
人無艱苦的計謀，僫得著世間的錢財。
這是講，人著盡本份來做工，毋通貪清閒，毋通想貧惰。
65. * Khiàm-chè oàn châi-chú, put-hàu oàn hū-bú.
Khiàm chîⁿ--ê oàn-hūn chè-chú, put-hàu--ê oàn-hūn pē-bú.
Che sī chhin-chhiūⁿ lâng khiàm hó tek-hēng, pōe-ge̍k Siōng-tè, chiū oàn-hūn tō-lí, húi-pòng kàu-hōe.
65. * 欠債怨財主，不孝怨父母。
欠錢的怨恨債主，不孝的怨恨爸母。
這是親像人欠好德行，背逆上帝，就怨恨道理，誹謗教會。
66. Siông chia̍h-chiú bōe chùi, siông kìⁿ-koaⁿ m̄-ùi.
Siông-siông chia̍h-chiú, bōe chiú-chùi; siông-siông kìⁿ koaⁿ-hú, bōe kiaⁿ-uì.
Che sī kóng, kok-hāng sū koàn-sì chiū sêng chū-jiân; só͘-í tio̍h ha̍k-si̍p, m̄-thang hiâm hùi-khì, m̄-thang ùi kan-khó͘.
66. 常食酒袂醉，常見官毋畏。
常常食酒，袂酒醉；常常見官府，袂驚畏。
這是講，各項事慣勢就成自然；所以著學習，毋通嫌費氣，毋通畏艱苦。
67. Ōe tèng chú-lâng ì, piān-sī hó kang-hu.
Ōe ha̍h chú-lâng ê ì-sù, chiū sī hó ê kang-hu.
Che sī kóng, lâng kā chú-lâng chòe-kang, tio̍h thàn chú-lâng ê só͘-ài.
67. 會中主人意，便是好工夫。
會合主人的意思，就是好的工夫。
這是講，人共主人做工，著趁主人的所愛。
68. Bat sǹg, m̄-bat tû; thó bí, ōaⁿ han-chû.
Ōe-hiáu sǹg-siàu, bōe-hiáu tùi-tû, chiū the̍h bí khì ōaⁿ han-chû.
Che sī kóng, gōng ê lâng tham-sim ài khah-chōe, sòa chiong ta̍t-chîⁿ khah-hó ê mi̍h khì ōaⁿ khah-bái--ê.
68. 捌算，毋捌除；討米，換頇薯。
會曉算數，袂曉對除，就提米去換頇薯。
這是講，戇的人貪心愛較濟，紲將值錢較好的物去換較䆀的。
69. Hó-thiⁿ bô chûn hō͘ lâi niû; kàu hō͘ lâi chiū bô su-niû.
Bô hō͘ ê sî bô chhûn-pān bí-niû khí-lâi khǹg; kàu lo̍h-hō͘ hit-sî, chiū bô kè-chhek thang su-niû.
Che sī kóng, lâng tio̍h liōng-chá pī-pān; kàu khiàm-ēng hit-sî chiah ū thang ēng.
69. 好天無存雨來糧；到雨來就無思量。
無雨的時無存範米糧起來囥；到落雨彼時，就無計策通思量。
這是講，人著冗早備辦；到欠用彼時才有通用。
70. Chāi-siⁿ m̄ hàu nâ-âu, sí-liáu chiah hàu koaⁿ-chhâ-thâu.
Pē-bú oa̍h ê sî, m̄ bóe hó-mi̍h lâi hō͘ i chia̍h; kàu pē-bú sí, chiah ēng seng-lé hó-mi̍h khì hiàn-chè.
Che sī kóng, lâng hōng-iōng tī chāi-siⁿ ê sî, m̄-thang thèng-hāu sí-āu chiah lâi hàu.
70. 在生毋孝嚨喉，死了才孝棺柴頭。
爸母活的時，毋買好物來予伊食；到爸母死，才用牲醴好物去獻祭。
這是講，人奉養佇在生的時，毋通聽候死後才來孝。
71. Ū-sim phah chio̍h, chio̍h chiâⁿ-chhng; bô-sim lì-chóa, chóa bōe phòa.
Ū chì-khì khì phah chio̍h, chio̍h ia̍h ōe kui-khang kui-chhng; nā bô sim-ì lâi thiah chóa, chóa ia̍h bōe phòa.
Che sī kóng, lâng tio̍h koat-ì chīn-la̍t, sū chiū chòe ōe-tit-chiâⁿ.
71. 有心拍石，石成穿；無心剺紙，紙袂破。
有志氣去拍石，石亦會歸空歸穿；若無心意來拆紙，紙亦袂破。
這是講，人著決意盡力，事就做會得成。
72. Jîn-sim put-chiok, chôa thun chhiūⁿ.
Lâng ê tōa sim-koaⁿ put-ti-chiok, chhin-chhiūⁿ hit bé chôa siūⁿ beh thun-chia̍h hit chiah chhiūⁿ; chhiūⁿ sī kài tōa chiah ê siù.
Che sī kóng, lâng ê sim-koaⁿ siuⁿ-tōa, iā-sī án-ni.
72. 人心不足，蛇吞象。
人的大心肝不知足，親像彼尾蛇想欲吞食彼隻象；象是蓋大隻的獸。
這是講，人的心肝傷大，也是按呢。
73. Chhiú kia̍h tōa-hiaⁿ teh hiàm chha̍t.
"Tōa-hiaⁿ" sī chha̍t ê ke-si (tek-kùn).
Che sī kóng, pún-sin chòe chha̍t, ia̍h thàn lâng teh hiàm chha̍t. Chhin-chhiūⁿ ka-kī ū pháiⁿ, ia̍h thàn lâng hiâm pa̍t-lâng ê pháiⁿ.
73. 手攑大兄咧喊賊。
「大兄」是賊的家私（竹棍）。
這是講，本身做賊，亦趁人咧喊賊。親像家己有歹，亦趁人嫌別人的歹。
74. Ū, chòe hó͘ chām; bô, chòe hó͘ thèⁿ-ām.
Hó͘ nā ū tit-tio̍h oa̍h-mi̍h, chiū chòe-chi̍t-ōe chia̍h-liáu-liáu; nā bô thang chia̍h, chiū siang-kha thèⁿ ām-kún teh khiā.
Che sī kóng, lâng ê tōa-chia̍h bô chhun āu, iā-sī án-ni.
74. 有，做虎站；無，做虎牚頷。
虎若有得著活物，就做一下食了了；若無通食，就雙跤牚頷頸咧徛。
這是講，人的大食無賰後，也是按呢。
◇有，做一站；無甲虎牚頷。
◇虎牚頷: to prop up the chin or both cheeks in one's hands while pressing the arms on one's knees in a crouched position.
75. Lîm Tāi-khiân (Lîm Tō-khiân), chù chhèng phah ka-kī.
Kó͘-chá ū sìⁿ Lîm, miâ Tāi-khiân ê lâng; i chòe bú-koaⁿ chiū chù tōa-chhèng beh phah hia-ê chha̍t, chóng-sī sit-chhò khì phah-tio̍h i pún-sin.
Che sī kóng, lâng ēng kè-bô͘ beh hāi pa̍t-lâng, khiok hāi-tio̍h ka-kī, iā-sī án-ni.
75. 林大乾 (林道乾)，鑄銃拍家己。
古早有姓林，名大乾的人；伊做武官就鑄大銃欲拍遐的賊，總是失錯去拍著伊本身。
這是講，人用計謀欲害別人，卻害著家己，也是按呢。
◇林道乾（林大乾）：潮州惠來人，明國嘉靖到萬曆時代，閩粵、南洋的大海賊，後來做到馬來半島北大泥國（Patani Kingdom）的大官，予北大泥人看做大英雄。看：Lin Daoqian - Wikipedia，林道乾 - 維基百科，自由的百科全書。
76. Tōa-him sái gâi-chîⁿ.
Lâng chhah pháiⁿ-chîⁿ khì bóe-mi̍h, bōe-mi̍h--ê beh kah i tio̍h ōaⁿ, i chiū tōa-siaⁿ háng-hoah, chìⁿ m̄-sī pháiⁿ-chîⁿ, tì-kàu hō͘ bōe-mi̍h ê lâng kiaⁿ-hiâⁿ, sòa m̄-káⁿ kā i ōaⁿ.
Che sī kóng, lâng ēng háng-hoah lâi hêng-ge̍k lâng.
76. 大廞使呆錢。
人紮歹錢去買物，賣物的欲佮伊著換，伊就大聲哄喝，諍毋是歹錢，致到予賣物的人驚惶，紲毋敢共伊換。
這是講，人用哄喝來橫逆人。
77. Soaⁿ-téng bô hó kiò, soaⁿ-ē bô hó ìn.
Soaⁿ-téng nā bô hó siaⁿ-im lâi kiò, soaⁿ-kha chiū bô hó siaⁿ-sàu lâi ìn-tap.
Che sī pí-phēng lán nā bô hó khoán-thāi lâng, i iā bô hó khoán-thāi lán.
77. 山頂無好叫，山下無好應。
山頂若無好聲音來叫，山跤就無好聲嗽來應答。
這是比並咱若無好款待人，伊也無好款待咱。
78. * Siōng put-chèng, chek hā oai.
Sī-tōa nā bô toan-chiàⁿ, sī-sòe chiū tè i oai-chhoa̍h.
Che sī kóng, chòe sī-tōa tio̍h chèng-khì; nā bô, sī-sòe chiū m̄ sūn-ho̍k.
78. * 上不正，則下歪。
序大若無端正，序細就綴伊歪斜。
這是講，做序大著正氣；若無，序細就毋順服。
79. * Chāi-siⁿ m̄-jīn hûn, sí-liáu m̄-jīn si.
"Hûn", sī sîn-hûn; "si", sī sin-si; "m̄-jīn", sī bōe-jīn--tit. Só͘-í lâng bē sí, m̄-bat lêng-hûn sī tùi-tiōng; lâng nā sí, m̄-chai he̍k-sin bô lō͘-ēng.
Che sī kóng, lán nā bô hit ê chit-jīm, chiū bô-beh tam-tng hit ê chek-sêng.
79. * 在生毋認魂，死了毋認屍。
「魂」，是神魂；「屍」，是身屍；「毋認」，是袂認得。所以人未死，毋捌靈魂是對重；人若死，毋知肉身無路用。
這是講，咱若無彼个職任，就無欲擔當彼个責成。
◇這條的解說，可能毋著。按：《增廣賢文》：『生不論魂，死不認屍。』《台日》：『生不認魂，死不認屍。生死靈魂不可理解。』
80. * Kok io̍k pāi, chhut loān sîn; ka io̍k phò, chhut gâi-jîn.
Kok nā beh pāi, chiū tāi-seng chhut hoán-poān ê jîn-sîn; ke nā beh phòa, chiū tāi-seng chhut chhi-gâi tòng-gōng ê lâng.
Che sī kóng, tāi-chì iáu-bē lâi, tāi-seng chiū ū hit ê tiāu-thâu.
80. * 國欲敗，出亂臣；家欲破，出呆人。
國若欲敗，就代先出反叛的人臣；家若欲破，就代先出痴呆侗戇的人。
這是講，代誌猶未來，代先就有彼个兆頭。
一個國家出現違法亂紀的公職人員的時候，可能就將要衰微，甚至滅亡了。
一個家族出現愚昧顛狂的家族成員的時候，可能就將要衰微，甚至滅亡了。
81. Nńg thô͘ chhim ku̍t.
Thô͘ nā khah-nńg, chiū tî-thâu ku̍t--lo̍h-khì khah-chhim.
Che sī kóng, lâng nā loán-jio̍k un-jiû, chiū hō͘ lâng khi-hū khah thiám.
81. 軟塗深掘。
塗若較軟，就鋤頭掘落去較深。
這是講，人若軟弱溫柔，就予人欺負較忝。
82. * Siâ put tàu chèng.
Siâ--ê, kàu-bé bōe-kham-tit kap chèng--ê saⁿ-tàu.
Che sī kóng, lâng chóng-tio̍h chòe chèng-khì tiong-hō͘ khah ū té-tì, kàu-bé khah-iâⁿ.
82. * 邪不鬥正。
邪的，到尾袂堪得佮正的相鬥。
這是講，人總著做正氣忠厚較有底蒂，到尾較贏。
83. * Kóaⁿ put te̍k chiòng.
Chió--ê bōe tí-tng--tit chōe--ê.
Che sī kóng, chió tâng-phōaⁿ ê lâng, bōe-kham-tit kap lâng-chiòng chōe--ê tùi-te̍k.
83. * 寡不敵眾。
少的袂抵當得濟的。
這是講，少同伴的人，袂堪得佮人眾濟的對敵。
84. * Jîn-gī bo̍k kau châi, kau châi jîn-gī choa̍t.
Jîn-gī ê pêng-iú, bo̍h-tit ēng chîⁿ-châi saⁿ kau-pê; kiaⁿ-liáu nā kau chîⁿ-châi, chiū tì-kàu hāi-tio̍h jîn-gī, hō͘ jîn-gī choa̍t-tn̄g--khì.
84. * 仁義莫交財，交財仁義絕。
仁義的朋友，莫得用錢財相交陪；驚了若交錢財，就致到害著仁義，予仁義絕斷去。
85. Mn̂g-hō͘ phòa-sàm, ke káu loān-chông.
Phòa-sàm, sī pāi-hoāi; loān-chông, sī lām-sám chhut-ji̍p pháu-cháu.
Che sī kóng, lâng nā pháiⁿ ke-kàu, lāi-bīn bô chèng-chong, chiū ū pháiⁿ lâng lām-sám chhut-ji̍p loān-loān-chông.
85. 門戶破鬖，雞狗亂傱。
破鬖，是敗壞；亂傱，是濫糝出入跑走。
這是講，人若歹家教，內面無整裝，就有歹人濫糝出入亂亂傱。
86. O͘-káu thau-chia̍h, pe̍h-káu siū-chōe.
O͘-káu thau-chia̍h lâng ê mi̍h, liân-lūi pe̍h-káu khì hō͘ lâng phah.
Che sī kóng, tâng-phōaⁿ chòe-pháiⁿ liân-lūi--tio̍h pa̍t-ê khì thòe i siū-khó͘.
86. 烏狗偷食，白狗受罪。
烏狗偷食人的物，連累白狗去予人拍。
這是講，同伴做歹連累著別个去替伊受苦。
87. Phah chháu kiaⁿ chôa, thâi ke kà kâu.
Tiau-kò͘-ì phah chháu, sī beh hō͘ chôa kiaⁿ; bô in-toaⁿ thâi ke, sī beh kà-sī kâu, hō͘ i chai thang kiaⁿ.
Che sī kóng, kà-sī chit-ê sī beh hō͘ hit-ê thang kiaⁿ.
87. 拍草驚蛇，刣雞教猴。
刁故意拍草，是欲予蛇驚；無因端刣雞，是欲教示猴，予伊知通驚。
這是講，教示這个是欲予彼个通驚。
88. Súi-ke thiàu-hn̄g, m̄-kú sīm kú.
Súi-ke chin gâu thiàu, m̄-kú chi̍t-ē thiàu, chiū thêng lōa-kú chiah koh-chài thiàu. "Sīm," sī khiā-sīm.
Che sī kóng, lâng sui-jiân gâu chhut-la̍t, m̄-kú ia̍h gâu iân-chhiân, bô chiâu-ûn, chiū bô lō͘-ēng.
88. 水雞跳遠，毋久愖久。
水雞真𠢕跳，毋久一下跳，就停偌久才閣再跳。「愖」，是徛愖。
這是講，人雖然𠢕出力，毋久亦𠢕延延，無齊勻，就無路用。
89. Chhùi-khí kap chi̍h ia̍h ū-sî saⁿ-gāi.
"Gāi," sī siong-giā; chhin-chhiūⁿ ū-sî chia̍h-mi̍h kā-tio̍h chi̍h, á-sī kā-tio̍h chhùi-phóe.
Che sī phì-jū hó pêng-iú á-sī ke-lāi ê lâng, ū-sî bōe-bián-tit put-hô, bōe-bián-tit saⁿ-gāi.
89. 喙齒佮舌亦有時相礙。
「礙」，是相礙；親像有時食物咬著舌，抑是咬著喙䫌。
這是譬喻好朋友抑是家內的人，有時袂免得不和，袂免得相礙。
90. Iâm kàu, kê àu.
Ū lâng beh sīⁿ hî-kê, chóng-sī thèng-hāu lâng khì bóe iâm, bóe ê lâng iân-chhiân chin-kú, tì-kàu iâm lâi, hî í-keng àu.
Che sī kóng, lâng tú-tio̍h iàu-kín ê sū, nā iân-chhiân chiū bōe-hù, sòa gō͘-tio̍h tāi-chì.
90. 鹽到，膎漚。
有人欲豉魚膎，總是聽候人去買鹽，買的人延延真久，致到鹽來，魚已經漚。
這是講，人拄著要緊的事，若延延就袂赴，紲誤著代誌。
91. Ok-bé ok-lâng khiâ.
Ok ê bé, tú-tio̍h hó-táⁿ ióng-béng ê lâng chiū káⁿ khiâ.
Che sī kóng, pháiⁿ lâng iáu ū pí i kok-khah pháiⁿ--ê lâi koán-hat--i; chhin-chhiūⁿ kóng, "Tâng-lâng tú-tio̍h thih-lâng."
91. 惡馬惡人騎。
惡的馬，拄著好膽勇猛的人就敢騎。
這是講，歹人猶有比伊閣較歹的來管轄伊；親像講，「銅人拄著鐵人。」
92. * Bo̍k sìn tit tiong-ti̍t, su-hông jîn put-jîn.
Bo̍h-tit sìn tiâu-ti̍t tiong-kan ê hó, tio̍h tî-hông jîn-ài tiong-kan ê pháiⁿ.
Che sī kóng, lâng ū-sî gōa-māu sui-bóng sī hó, kî-si̍t sim-lāi sī khǹg pháiⁿ, só͘-í tio̍h kín-sīn tî-hông.
92. * 莫信直中直，須防仁不仁。
莫得信條直中間的好，著持防仁愛中間的歹。
這是講，人有時外貌雖罔是好，其實心內是囥歹，所以著謹慎持防。
93. Khí-thiàⁿ chiah chai khí-thiàⁿ lâng.
Pún-sin bat chhùi-khí-thiàⁿ, chiàⁿ ōe chai pa̍t-lâng ê kan-khó͘.
Che sī kóng, lâng tio̍h pún-sin keng-kè, chiah chai pa̍t-lâng ê kan-khó͘.
93. 齒疼才知齒疼人。
本身捌喙齒疼，正會知別人的艱苦。
這是講，人著本身經過，才知別人的艱苦。
94. Ke-sîn thong gōa-kúi.
Ke-lāi ê sîn, khì su-thong gōa-bīn ê kúi.
Che sī phì-jū ka-kī ê chhin-chhek á-sī lāi-bīn ê kha-chhiú khì kap pa̍t-lâng su-thong kè-bô͘.
94. 家神通外鬼。
家內的神，去私通外面的鬼。
這是譬諭家己的親戚抑是內面的跤手去佮別人私通計謀。
95. M̄-bián saⁿ-chhùn chúi, chiū beh pê liông-chûn.
Iáu-bē ū saⁿ-chhùn chúi ê chhim, teh siūⁿ beh pê liông-chûn.
Che sī phì-jū lâng bē ū hit-hō tōe-pō͘, chiū teh khoa-kháu.
95. 毋免三寸水，就欲扒龍船。
猶未有三寸水的深，咧想欲扒龍船。
這是譬喻人袂有彼號地步，就咧誇口。
96. Saⁿ-ji̍t sóa-chai, sì-ji̍t khiā-n̂g.
Saⁿ-ji̍t chhian-sóa hoe-chai, sì-ji̍t hoe chiū ko͘-tâ bōe chhiⁿ-chhùi.
Che sī phì-jū lâng tau̍h-tau̍h ōaⁿ i ê kan-kí thâu-lō͘, chiū ōe sún-sit.
96. 三日徙栽，四日徛黃。
三日遷徙花栽，四日花就枯焦袂青翠。
這是譬諭人沓沓換伊的經紀頭路，就會損失。
97. Ke-lāi bô bâ, niáu-chhú khiau-kha.
"Bâ" sī niau; chhù-lāi nā bô bâ, niáu-chhú chiū hó-táⁿ khiau-kha teh chē.
Che sī kóng, sī-tōa nā bô tī-teh, sī-sòe chiū káⁿ hòng-chhiòng, in-ūi bô lâng koán-hat.
97. 家內無猫，鳥鼠曲跤。
「猫」是貓；厝內若無猫，鳥鼠就好膽曲跤咧坐。
這是講，序大若無佇咧，序細就敢放縱，因為無人管轄。
98. * Bâ, chhú, tông-biân.
Niau kap niáu-chhú chò-hóe khùn.
Che sī kóng, thâu-ba̍k siū-iū, chiū iông-ún i ê kha-chhiú khì chòe pháiⁿ; chhin-chhiūⁿ koaⁿ-hú chia̍h chîⁿ, chiū kap pháiⁿ-lâng su-thong kè-bô͘.
98. * 猫、鼠同眠。
貓佮鳥鼠做伙睏。
這是講，頭目受賄，就容允伊的跤手去做歹；親像官府食錢，就佮歹人私通計謀。
99. Ba̍k-sat bo̍h-tit chhiò chhiū-gūi chhàu-chhiⁿ.
Chhiū-gūi sī chhàu-chîⁿ-ku-á ê lūi, ba̍t-sat iā chhàu-chhiⁿ.
Che sī kóng, lâng ka-kī ū pháiⁿ, chiū m̄-thang chhiò pa̍t-lâng ê pháiⁿ.
99. 木蝨莫得笑樹魏臭腥。
樹魏是臭錢龜仔的類，木蝨也臭腥。
這是講，人家己有歹，就毋通笑別人的歹。
100. Ku-thâu ia̍h sioh, ku-bé ia̍h sioh.
Ku ê thâu kap bé, khah-siông sī kiu--teh, m̄-káⁿ chhun--chhut-lâi.
Che sī kóng, lâng sioh sìⁿ-miā siuⁿ kè-thâu.
100. 龜頭亦惜，龜尾亦惜。
龜的頭佮尾，較常是勼咧，毋敢伸出來。
這是講，人惜性命傷過頭。
101. Tīⁿ, kiaⁿ-sí; pàng, kiaⁿ-pe.
Chhiú lia̍h chiáu-á beh ni̍h-ân, kú kiaⁿ-liáu i sí; nā beh pàng lēng, kú kiaⁿ i pe--khì.
Che sī pí-phēng lâng pé-pa̍k chîⁿ, ia̍h sī án-ni.
101. 捏，驚死；放，驚飛。
手掠鳥仔欲捏絚，詎驚了伊死；若欲放冗，詎驚伊飛去。
這是比並人把縛錢，亦是按呢。
102. Chúi-chiⁿ chiò po-lê, kiàⁿ tú kiàⁿ.
Chúi-chiⁿ kap po-lê pîⁿ-pîⁿ kng, nā tùi-chiò, lóng khòaⁿ bêng-bêng.
Che sī pí-phēng tì-sek--ê kap tì-sek-ê bô͘-sū, iā-sī án-ni.
102. 水晶照玻璃，鏡拄鏡。
水晶佮玻璃平平光，若對照，攏看明明。
這是比並智識的佮智識的謀事，也是按呢。
103. * Jîn ūi châi sú, niáu ūi si̍t bông.
Lâng ūi-tio̍h chîⁿ-châi chiah sí-sit; chiáu-á ūi-tio̍h tham-chia̍h chiah bia̍t-bô.
Che sī khǹg lâng m̄-thang tham.
103. * 人為財死，鳥為食亡。
人為著錢財才死失；鳥仔為著貪食才滅無。
這是勸人毋通貪。
104. Chioh kiô kiâⁿ lō͘, chioh to sat-jîn.
"Sat-jîn" sī thâi lâng.
Che nn̄g kù ōe sī kóng lâng chioh pa̍t-lâng ê sè-le̍k lâi lī-ek ka kī, hām-hāi pa̍t-lâng.
104. 借橋行路，借刀殺人。
「殺人」是刣人。
這兩句話是講人借別人的勢力來利益家己，陷害別人。
105. * It-jîn thoân hi, pek-jîn thoân sit.
Chi̍t láng thoân bô-iáⁿ ê ōe, chiū tì-kàu chi̍t-pah lâng lia̍h-chòe si̍t-chāi lâi liû-thoân.
Che sī pí-phēng, sui sī pe̍h-chha̍t ê ōe, nā chōe-lâng kóng, chiū pìⁿ si̍t-chāi.
105. * 一人傳虛，百人傳實。
一人傳無影的話，就致到一百人掠做實在來流傳。
這是比並，雖是白賊的話，若濟人講，就變實在。
106. Kut-la̍t chia̍h-la̍t, pîn-tōaⁿ thun-nōa.
Kut-la̍t--ê tùi i ê khùi-la̍t thàn-chia̍h; pîn-tōaⁿ--ê m̄ thó-thàn chiū bô thang chia̍h, kan-ta thun-nōa nā-tiāⁿ.
Che sī khǹg lâng tio̍h kut-la̍t; nā bô, to bô thang chia̍h.
106. 骨力食栗，貧惰吞瀾。
骨力的對伊的氣力趁食；貧惰的毋討趁就無通食，干焦吞瀾若定。
這是勸人著骨力；若無，都無通食。
107. Ū--ê m̄-kóng, bô--ê phín-phóng.
Ū ê lâng m̄ kóng-khí, nā-sī bô ê lâng siông-siông ài phín-phóng khoa-kháu.
Che sī chí lâng ū châi-tiāu kap chîⁿ-châi, khah-siông sī án-ni.
107. 有的毋講，無的品捧。
有的人毋講起，若是無的人常常愛品捧誇口。
這是指人有才調佮錢財，較常是按呢。
108. Sio-mē bo̍h iah chia̍h, sio-phah bo̍h phah-hia̍h.
"Iah chia̍h" sī kóng-khí pêng-sò͘ hō͘ lâng chia̍h; kóng án-ni ōe ka-kī kiàn-siàu, só͘-í bo̍h--tit khah-hó; phah-hia̍h sī in-ūi thâu-hia̍h tī bīn-chêng-tông, khoài-khoài lâu huih, lâng chi̍t-ê khòaⁿ, liâm-piⁿ chai siū-siong, kóng phah--ê m̄-tio̍h.
108. 相罵莫搤食，相拍莫拍額。
「搤食」是講起平素予人食；講按呢會家己見笑，所以莫得較好；拍額是因為頭額佇面前堂，快快流血，人一下看，連鞭知受傷，講拍的毋著。
109. Chhian ke pù, bōe kò͘-tit chi̍t ke kêng.
Chit chheng ke ê pù-lâng lâi chiàu-kò͘ chi̍t ke ê sòng-hiong lâng, ia̍h kò͘ bōe-tit chiâu-chīn.
Che sī kóng, lâng bōe-tit thang óa-khò pa̍t-lâng khòaⁿ-kò͘, kin-tu sī hùi-khì ê sū.
109. 千家富，袂顧得一家窮。
一千家的富人來照顧一家的喪凶人，亦顧袂得齊盡。
這是講，人袂得通倚靠別人看顧，均都費氣的事。
110. Saⁿ thiaⁿ koaⁿ, bōe phòaⁿ-tit lâng ke-lāi tāi.
Chi̍t-ūi ê koaⁿ-hú, sǹg sī chi̍t-thiaⁿ-koaⁿ; "phòaⁿ", sī sím-phòaⁿ kàu bêng; in-ūi lâng ê ke-lāi sū, ū-sî chin khut-khiok, chin îⁿ-tîⁿ, pa̍t-lâng oh-tit chai só͘-í-jiân; sui-bóng saⁿ-ê koaⁿ-hú ha̍p chò-hóe sím-phòaⁿ, ia̍h sī phòaⁿ bōe bêng.
110. 三廳官，袂判得人家內代。
一位的官府，算是一廳官；「判」，是審判到明；因為人的家內事，有時真屈曲，真縈纏，別人僫得知所以然；雖罔三个官府合做伙審判，亦是判袂明。
111. * Oán-chhin put-jû kūn-lîn.
Hn̄g-tau ê chhin-chhek, m̄-ta̍t-tio̍h kūn-tau ê chhù-piⁿ, in-ūi kín-kip sū, nā bô chhù-piⁿ tàu chān, thèng-hāu chhin-chhek lâi bōe hù; chhin-chhiūⁿ sio̍k-gú kóng, "Iâm kàu kê àu."
111. * 遠親不如近鄰。
遠兜的親戚，毋值著近兜的厝邊，因為緊急事，若無厝邊鬥贊，聽候親戚來袂赴；親像俗語講，「鹽到膎漚。」
沒有留言:
張貼留言