苦勸偷走厝的查某囡仔轉厝

苦勸偷走厝的查某囡仔轉厝 

Khó͘-khǹg thau-cháu-chhù ê cha-bó͘-gín-á tńg-chhù.

語苑 第34卷第10號 昭和16年1941年10月16日頁41-46 臺灣語通信研究會

保安警察の部 第三十七課 家出人說諭 

特藏臺灣期刊文獻 · 保安警察の部 · 國立臺灣大學圖書館數位典藏館 語苑 19411016

　范：你有叫我來，我就是范氏桂妹。

　Hoān: Lí ū kiò góa lâi, góa chiū-sī Hoān-sī Kùi-mōe.  

　警：你現時蹛佇新富町三丁目九番地魏樹木遐，是毋？ 

　Kéng: Lí hiān-sî tòa tī Sin-hù-teng saⁿ-teng-bo̍k káu-hoan-tē Gūi Chhiū-bo̍k hia, sī m̄? 

　◇新富町：現在的台北萬華三水街角勢。

　范：是按呢都著。

　Hoān: Sī án-ni to tio̍h. 

　警：你自底當時就來蹛遐？ 

　Kéng: Lí chū tī-tang-sî chiū lâi tòa hia? 

　范：我來遐差不多三月外日。 

　Hoān: Góa lâi hia chha-put-to saⁿ goe̍h-gōa-ji̍t. 

　警：你本居地佇大湖郡大湖庄馬那邦九番地，是毋？猶你今年幾歲？　

　Kéng: Lí pún-ki-tē tī Tōa-ô͘-kūn Tōa-ô͘-chng Má-ná-pang káu-hoan-tē, sī m̄? Iá lí kin-nî kúi hòe? 

　◇大湖郡大湖庄馬那邦：現在的苗栗大湖東興村馬那邦山區。

　范：是，本居地佇遐。我今年十九歲。 

　Hoān: Sī, pún-ki-tē tī-hia. Góa kin-nî cha̍p-káu hòe. 

　警：你欲來台北的時，敢有對恁爸母講？𪜶歡喜予你來，是毋？ 

　Kéng: Lí beh lâi Tâi-pak ê sî, kám ū tùi lín pē-bú kóng? In hoaⁿ-hí hō͘ lí lâi, sī m̄? 

　范：無咧，我無共講，恬恬來。　

　Hoān: Bô leh, góa bô kā kóng, tiām-tiām lâi. 

　警：是按怎恬恬走出來？你講予我聽。 

　Kéng: Sī-án-chóaⁿ tiām-tiām cháu--chhut-lâi? Lí kóng hō͘ góa thiaⁿ. 

　范：我三歲的時，做𪜶的新婦仔去蹛遐。　自囡仔到今，阮親生的爸母也毋捌來，毋知咧創啥。　阮遐大家大官不時苦毒我，我蹛袂牢，才走出來。 

　Hoān: Góa saⁿ-hòe ê sî, chòe in ê sin-pū-á khì tòa hia. 　Chū gín-á kàu-taⁿ, gún chhin-seⁿ ê pē-bú iā m̄-bat lâi, m̄ chai teh chhòng siáⁿ. 　Gún hia ta-ke ta-koaⁿ put-sî khó͘-to̍k--góa, góa tòa-bē-tiâu, chiah cháu--chhut-lâi. 

　警：欸，敢毋是按呢啊！恁本居地的保正佮彼塊的人，昨昏暗有來遮講：恁養爸養母將你欲配予𪜶大後生文良，你嫌伊，毋肯，紲討著大湖的洪順。　你偷提恁養爸的錢三百箍，走出來，著毋？查某囡仔心肝遐雄，按呢那會用得！　我共你講：恁養爸養母共你搦屎搦尿，養飼甲大漢，𪜶的恩情有較贏親生的爸母。　你也無想欲報答𪜶的恩情，毋聽𪜶的喙。　閣𠢕嫌你的頭對，另外綴著別人。　猶閣恬恬提厝內的錢，走出來。　做查某囡仔的人，按呢敢會用得！按呢會使得講捌人情的人袂？　𪜶欲共恁捒做堆，你若無愛，你毋著講代誌求情予𪜶了解才好。　猶紲佮別个相好，彼款亂使做，真袂用得！　是你毋著，抑是𪜶毋著，你摸心肝勻勻仔想看覓咧。　恁養爸拜託人來講：欲𤆬你轉去。　今你著佮伊轉去，才佮序大人佮親情商量才好。

　Kéng: Eh, kám m̄-sī án-ni ah! Lín pún-ki-tē ê pó-chèng kap hit-tè ê lâng, cha-hng-àm ū lâi chia kóng: Lín iúⁿ-pē iúⁿ-bú chiong lí beh phòe hō͘ in tōa hāu-seⁿ Bûn-liông, lí hiâm--i, m̄-khéng, sòa thó-tio̍h Tōa-ô͘ ê Âng Sūn. 　Lí thau-the̍h lín iúⁿ-pē ê chîⁿ saⁿ-pah-kho͘, cháu--chhut-lâi, tio̍h m̄? Cha-bó͘-gín-á sim-koaⁿ hiah hiông, án-ni ná ē-ēng-tit! 　Góa kā lí kóng: Lín iúⁿ-pē iúⁿ-bú kā lí la̍k-sái-la̍k-jiō, iúⁿ-chhī kah tōa-hàn, in ê un-chêng ū khah-iâⁿ chhin-seⁿ ê pē-bú. 　Lí iā bô siūⁿ-beh pò-tap in ê un-chêng, m̄ thiaⁿ in ê chhùi. 　Koh gâu hiâm lí ê thâu-tùi, lēng-gōa tòe-tio̍h pa̍t-lâng. 　Iá-koh tiām-tiām the̍h chhù-lāi ê chîⁿ, cháu--chhut-lâi. 　 Chòe cha-bó͘-gín-á ê lâng, án-ni kám ē-ēng-chit! Án-ni ōe-sái-tit kóng bat-jîn-chêng ê lâng bōe? 　In beh kā lín sak-chòe-tui, lí nā bô-ài, lí m̄-tio̍h kóng-tāi-chì kiû-chêng hō͘ in liáu-kái chiah hó. 　Iá sòa kap pa̍t-ê siong-hó, hit-khoán loān-sú chòe, chin bōe-ēng-tit! 　Sī lí m̄-tio̍h, ia̍h-sī in m̄-tio̍h, lí bong sim-koaⁿ khoaⁿ-khoaⁿ-á siūⁿ-khòaⁿ-māi leh. 　Lín iúⁿ-pē pài-thok lâng lâi kóng: Beh chhōa lí tńg--khì. 　Taⁿ lí tio̍h kap i tńg--khì, chiah kap sī-tōa-lâng kap chhin-chiâⁿ siong-liông chiah hó.

　范：好好！真多謝，我趁你的命令欲轉去。

　Hoān: Nā-sī án-ni, lí chiong hāi-sí i ê chêng-hêng, kóng hō͘ góa thiaⁿ. 

　警察共范桂妹的序大佮親情講：恁都有聽見嘛？就是這款的情形。恁刁工來欲𤆬伊倒去，予恁真勞力。今恁共伊照顧，𤆬伊轉去。

　Kéng-chhat kā Hoān Kùi-mōe ê sī-tōa kap chhin-chiâⁿ kóng: Lín to ū thiaⁿ-kìⁿ mah? Chiū-sī chit-khoán ê chêng-hêng. Lín thiau-kang lâi beh chhōa i tò--khì, hō͘ lín chin ló͘-la̍t. Taⁿ lín kā i chiàu-kò͘, chhōa i tńg--khì. 

　眾人：好好，予你真勞力。 

　Chèng-lâng: Hó hó, hō͘ lí chin ló͘-la̍t.