新年附錄 正月會話 葉清耀
特藏臺灣期刊文獻 · 本島舊曆新年の概況に就て · 國立臺灣大學圖書館數位典藏館
語苑 第3卷第1號 明治43年1910年1月15日頁29-47 臺灣語通信研究會
春：新春兄，𠢕早，欲去佗位？
Sin-chhun hiaⁿ, gâu-chá, beh khì tó-ūi?
新：春來先生，你也遐𠢕早，敢是欲去街仔乎？
Chhun-lâi sian-siⁿ, lí iā hiah gâu-chá, kám-sī beh khì ke-á hoⁿh?
春：正是。年到囉，欲去辦淡薄仔貨。你是欲創啥物貨才來？
Chiàⁿ sī. Nî kàu lo͘h, beh khì pān tām-po̍h-á hòe. Lí sī beh chhong siáⁿ-mi̍h hòe chiah lâi?
新：我也是欲買寡過年的物才來，真拄好做陣來去。
Góa iá-sī beh bé kóa kòe-nî ê mi̍h chiah lâi, chin tú-hó chò-tīn lâi-khì.
春：新春兄，你今年敢長不止濟錢乎？
Sin-chhun hiaⁿ, lí kin-nî káⁿ tióng put-chí chē chîⁿ hoⁿh?
新：無遐好，今毋通講起。人無字運，三拄四毋著，險險袂通過年佇咧。先生，你較有，請撥寡好毋？
Bô hiah hó, taⁿ m̄-thang kóng-khí. Lâng bô jī-ūn, saⁿ-tú sì-m̄-tio̍h, hiám-hiám bē-thang kòe-nî tī leh. Sian-siⁿ, lí khah ū, chhiáⁿ poah kóa hó-m̄?
春：免講巧奇話，我都知：你這幾年勃勃賰錢，你都敢是驚我借咧！
Bián-kóng khiáu-kî-ōe, góa to chai: Lí chit-kúi-nî pu̍t-pu̍t chhun-chîⁿ, lí to káⁿ-sī kiaⁿ góa chioh leh!
新：彼毋是按呢講。先生你攏毋知：遮濟日，頭殼傱到無皮，實在艱苦，你知毋？
He m̄-sī án-ne kóng. Sian-siⁿ Lí lóng m̄-chai: Chiah-chē-ji̍t, thâu-khak chông kàu bô phôe, si̍t-chāi kan-khó͘, lí chai m̄?
春：今，毋通講閒話，連鞭到位囉！著較大伐行來去。
Taⁿ, m̄-thang kóng êng-ōe, liâm-mi kàu-ūi lo͘h! Tio̍h khah-tōa-hoa̍h kiâⁿ lâi-khì.
新：嚄！今仔日的街市，怎樣鬧熱甲按呢！到位囉，先生真𠢕行，今欲按佗位去？
Gōa! Kin-á-ji̍t ê ke-chhī, chóaⁿ-iūⁿ lāu-lia̍t kah án-ne! Kàu-ūi lo͘h, sian-siⁿ chin gâu kiâⁿ, taⁿ beh àn tó-ūi khì?
春：凊彩嘛好。你是欲到佗一坎店？
Chhìn-chhái mā hó. Lí sī beh kàu tó chi̍t-khám tiàm?
新：我是欲去舊底有交關的街尾極大坎號做合春的店。
Góa sī beh khì kū-té ū kau-koan ê ke-bóe ke̍k-tōa-khám hō-chò Ha̍p-chhun ê tiàm.
春：這猶閣較拄好，我猶原是欲去到彼坎。
Che iáu-koh-khah tú-hó, góa iu-goân sī beh khì-kàu hit-khám.
新：春來先生，合春號就是對面有咧賣大字彼間，咱著對這條橫街斡過來去。
Chhun-lâi sian-siⁿ, Ha̍p-chhun-hō tō-sī tùi-bīn ū teh bē tōa-jī hit-keng, lán tio̍h tùi chit-tiâu hoâiⁿ-ke oat-kòe lâi-khì.
春：我無啥捌來，驚行毋著路，費神你先行。
Góa bô-siáⁿ bat lâi, kiaⁿ kiâⁿ-m̄-tio̍h-lō͘, hùi-sîn lí seng-kiâⁿ.
新：好！來去。這間就是合春的店，今做伙入來去。
Hó! Lâi-khì. Chit-keng tō-sī Ha̍p-chhun ê tiàm, taⁿ chò-hóe ji̍p-lâi-khì.
◆
合：請兩位入來坐，𠢕早喔。
Chhiáⁿ nn̄g-ūi ji̍p-lâi-chē, gâu-chá o͘h.
兩：遐無閒！你的生理比別坎閣較出色。
Hiah bô-êng! Lí ê seng-lí pí pa̍t-khám koh-khah chhut-sek.
合：無，哪有！罔做爾爾。兩位請茶才去。請恁逐家閣較招呼。今仔日有欲挃啥貨毋？
Bô, ná-ū! bóng-chò niā-niā. Nn̄g-ūi chhiáⁿ-tê chiah-khì. Chhiáⁿ lín-ta̍k-ke koh-khah chio-ho͘. Kin-á-ji̍t ū-beh ti̍h-siáⁿ-hòe m̄?
新：有囉。春來先生，伊較遠，對伊个先款才著。
Ū lo͘h. Chhun-lâi sian-siⁿ, i khah hn̄g, tùi i-ê seng khoán chiah-tio̍h.
合：好，會用得。春來先生敢有開便單仔來喔？
Hó, ē-ēng-tit. Chhun-lâi sian-siⁿ kám-ū khui piān-toaⁿ-á lâi o͘h?
◇便單仔：目錄。
春：有，這張就是。
Ū, chit-tiuⁿ tō-sī.
合：照這張單提，敢無錯才著？
Chiàu chit-tiuⁿ toaⁿ the̍h, káⁿ-bô-chhò chiah-tio̍h?
春：毋知有寫落去無？念一逝予我聽才妥當。
M̄-chai ū siá-lak-khì bô? Liām chi̍t-chōa hō͘ góa thiaⁿ chiah thò-tòng.
合：好。就這張來看是欲挃：金銀紙、大小燭、茶料、香、糕仔、炮仔、鰇魚、鴨卵、紅紙、五福符、觀音像以外十數項，猶另外無矣是毋？
Hó. Chiū chit-tiuⁿ lâi-khòaⁿ sī beh ti̍h: Kim-gîn-chóa, tōa sió chek, tê-liāu, hiuⁿ, ko-á, phàu-á, jiû-hî， ah-nn̄g， âng-chóa, ngó͘-hok-hû, koan-im-siōng í-gōa cha̍p-sò͘-hāng, iáu lēng-gōa bo ah sī-m̄?
◇茶料：茶果子，甜料。
春：有卻是有。遐的我另外有開一張單。
Ū khiok-sī ū. Hia-ê góa lēng-gōa ū khui chi̍t-tiuⁿ toaⁿ.
合：公媽聯、門對、春仔、大壽字，遐的物件啥貨攏免是毋？
Kong-má-liân, mn̂g-tùi, chhun-á, tōa-siū-jī, hia-ê mi̍h-kiāⁿ siáⁿ-hòe lóng-bián sī-m̄?
春：遐的免囉。大字我家己都會寫淡薄仔。
Hia-ê bián lo͘h. Tōa-jī góa-ka-tī to-ē siá tām-po̍h-á.
合：是是。心肝無閒，煞袂記得。先生是寫大字較有名的人。
Sī sī. Sim-koaⁿ bô-êng, soah bē-kì-tit. Sian-siⁿ sī siá-tōa-jī khah-ū-miâ ê lâng.
春：今款有齊到抑是猶未？
Taⁿ khoán ū-chiâu-kàu ia̍h-sī iáu-bōe?
合：有。我已經有對兩回都無差。著閣點抑免？
Ū. Góa í-keng ū tùi nn̄g-hôe to bô-chha. Tio̍h koh tiám ia̍h bián?
春：無毋著就好。新春兄，我真拗蠻，代先轉。今，恁逐家請。
Bô m̄-tio̍h tō-hó. Sin-chhun hiaⁿ, góa chin áu-bân, tāi-seng tńg. Taⁿ, lín ta̍k-ke chhiáⁿ.
合：食晝才去啦，請寬行，正月請來𨑨迌。
Chia̍h-tàu chiah khì lah, chhiáⁿ khoaⁿ-kiâⁿ, chiaⁿ-goe̍h chhiáⁿ lâi chhit-thô.
◆
囝：喔，阿娘，阮老爸轉來囉。阿爸，買遐濟物，欲做啥貨？已經有食飽矣是毋？
O͘h, a-niâ, goán lāu-pē tńg-lâi lo͘h. A-pah, bé hiah chē mi̍h, beh chò siáⁿ-hòe? Í-keng ū chia̍h-pá ah sī-m̄?
父：猶未，戇囡仔，欲佗位食？佮你老母講：真無閒，著趕緊捀出來予我食。
Iáu-bōe, gōng-gín-á, beh tó-ūi chia̍h? Kap lí lāu-bú kóng: Chin bô-êng, tio̍h kóaⁿ-kín phâng chhut-lâi hō͘ góa chia̍h.
母：轉來啦是毋？今好食飯。
Tńg-lâi lah sī-m̄? Taⁿ hó-chia̍h-pn̄g.
父：豬、雞、鴨、魚，攏有刣好抑猶未？
Ti, ke, ah, hî, lóng-ū thâi-hó ia̍h iáu-bōe ?
妻：雞八隻、鴨五隻、魚四尾，攏好啦。干焦大豬猶未，今𪜶逐家扛去豬灶跤刣，連鞭就會轉來。
Ke peh chiah, ah gō͘ chiah, hî sì bóe, lóng hó lah. Kan-taⁿ tōa ti iáu-bōe, taⁿ in-ta̍k-ke kng-khì ti-chàu-kha thâi, liâm-mi tō ē tńg-lâi.
父：遐濟囡仔攏無佇咧，是去佗位仔？著叫較大漢的來鬥跤手。
Hiah chē gín-á lóng-bô tī-leh, sī khì tó-ūi-á? Tio̍h kiò khah tōa-hàn-ê lâi tàu-kha-chhiú.
囝：阿爸，你咧叫是毋？欲創啥貨？做你共我講。
A-pah, lí teh kiò sī-m̄? Beh chhòng siáⁿ-hòe? Chò lí kā góa kóng.
父：你著代先請觀音娘佮神牌請落來洗，神龕、神桌、神甌、薦盒：用燒水，燭臺：用雞毛水拭拭咧，香爐、金爐也著清，遐的做清楚；才用糊貼新的對，佮五福符、春仔、壽字、長錢物件，毋通袂記得。猶欲貼的時陣，有定著，左還左，右還右，的確毋通貼毋著去。
Lí tio̍h tāi-seng chhiáⁿ Koan-im-niû kap sîn-pâi chhiáⁿ lo̍h-lâi sé, sîn-kham, sîn-toh, sîn-au, chiàn-a̍p: ēng sio-chúi, chek-tâi: ēng ke-mo͘-chúi chhit-chhit leh, hiuⁿ-lô͘, kim-lô͘ iā-tio̍h chheng, hia-ê chò chheng-chhó; chiah ēng kô͘ tah sin-ê tùi, kap ngó͘-hok-hû, chhun-á, siū-jī, tn̂g-chîⁿ mi̍h-kiāⁿ, m̄-thang bē-kì-tit. Iáu beh tah ê sî-chūn, ū tiāⁿ-tio̍h, chó-hoân-chó, iū-hoân-iū, tek-khak m̄-thang tah m̄-tio̍h khì.
囝：無（問題）啦。舊年敢毋是我貼的是毋？
Bô (būn-tê) lah. Kū-nî kám-m̄-sī góa tah-ê sī-m̄?
父：今仔日是三十日，著較早創來拜神。
Kin-á-ji̍t sī saⁿ-cha̍p-ji̍t, tio̍h khah-chá chhòng lâi pài sîn.
母：我會曉。三牲這陣計一个好啦，聽候伊對糊了，我就捀來拜。
Góa ē-hiáu. Sam-seng chit-chūn kè chi̍t-ê hó lah, thèng-hāu i tùi kô͘ liáu, góa tō phâng lâi pài.
父：今三牲捀出來，啊恁逐家著洗手面，倚來參做伙拜。
Taⁿ sam-seng phâng-chhut-lâi, ah lín-ta̍k-ke tio̍h sé-chhiú-bīn, óa-lâi chham-chò-hóe pài.
母：對佗位先拜才著？
Tùi tó-ūi seng pài chiah-tio̍h?
父：先拜神明，後拜祖媽才著。
Seng pài Sîn-bêng, āu pài Chó͘-má chiah-tio̍h.
母：菜頭粿、紅龜粿佮甜粿，愛抑免？
Chhài-thâu-kóe, âng-ku-kóe kap tiⁿ-kóe, ài-ia̍h-bián?
父：甜粿夯一角來就好，賰的免。紅龜粿是明仔早起欲拜天公的。
Tiⁿ-kóe giâ chi̍t-kak lâi chiū-hó, chhun-ê bián. Âng-ku-kóe sī bîn-á-chá-khí beh pài Thiⁿ-kong ê.
妻：乎，按呢我隨時來去夯出來。
Hoⁿh, án-ne góa sûi-sî lâi-khì giâ-chhut-lâi.
囝：阿爸，三牲攏排好啦。著先點燈，點大燭，紲後才燒香是毋？
A-pah, sam-seng lóng pâi hó lah. Tio̍h seng tiám-teng, tiám tōa-chek, sòa-āu chiah sio-hiuⁿ sī-m̄?
父：按呢著。你先燒香，我才請神，斟酒斟三旬了，你著散金燒，紲放炮仔。
Án-ne tio̍h. Lí seng sio-hiuⁿ, góa chiah chhiáⁿ-sîn, thîn-chiú thîn saⁿ-sûn liáu, lí tio̍h sòaⁿ-kim-sio, sòa pàng-phàu-á.
囝：今，好燒金、放炮仔抑未？
Taⁿ, hó sio-kim, pàng-phàu-á ia̍h-bōe?
父：好囉，炮仔應該著捾去外口放。今好收起啦，猶著較早煮來食，明仔早起透早欲謝願。
Hó lo͘h, phàu-á eng-kai tio̍h kōaⁿ-khì gōa-kháu pàng. Taⁿ hó siu-khí lah, iáu-tio̍h khah-chá chú lâi chia̍h, bîn-á-chá-khí thàu-chá beh siā-goān.
母：連鞭就好，你做你預備謝願的代誌。
Liâm-mi tō-hó, lí chò-lí ī-pī siā-goān ê tāi-chì.
◆
囝：阿爸，阮老母講：已經好食啦。
A-pah, goán lāu-bú kóng: Í-keng hó chia̍h lah.
父：若好食，著叫大細齊齊做伙來圍爐。今暝是三十暗，箸碗著提予伊到額有賰，一家團圓恭喜。猶先吩咐恁遮的囡仔：今暝佮明仔日，毋通𧮙喙冤家、作孽、創治人；見著人，著好禮，毋通講衰潲話；食飯的時陣，也毋通講毋食，嫌七嫌八，才有乖巧，知毋？
Nā hó chia̍h, tio̍h kiò tōa-sè chê-chê chò-hóe lâi ûi-lô͘. Kim-mê sī saⁿ-cha̍p-àm, tī óaⁿ tio̍h the̍h hō͘ i kàu-gia̍h ū-chhun, chi̍t-ke thoân-îⁿ kiong-hí. Iáu seng hoan-hù lín chia-ê gín-á: Kim-mê kap bîn-á-ji̍t, m̄-thang chhoh-chhùi oan-ke, chok-gia̍t, chhòng-tī-lâng; Kìⁿ-tio̍h lâng, tio̍h hó-lé, m̄-thang kóng soe-siâu-ōe; Chia̍h-pn̄g ê sî-chūn, iā m̄-thang kóng m̄-chia̍h, hiâm-chhit-hiâm-pat, chiah-ū koai-khá, chai m̄?
◇箸碗著提予伊到額有賰：原底日譯：箸茶碗ハ人數ニ達シ餘リアル程持チ出シ （箸茶碗は人数に達し余りある程持ち出し）。意思敢若是：攢的碗箸（的額）較濟過食的人。
囝：阮逐家免講嘛知。今好來去食。
Goán ta̍k-ke bián-kóng mā-chai. Taⁿ hó lâi-khì chia̍h.
父：攏總做一下來，逐个坐予四正。我欲斟酒囉，毋啉酒的人食粿，抑貯飯食好。
Lóng-chóng chò-chi̍t-ē-lâi, ta̍k-ê chē hō͘ sì-chiàⁿ. Góa beh thîn-chiú lo͘h, m̄-lim-chiú ê lâng chia̍h kóe, ia̍h té-pn̄g chia̍h hó.
囝：阿娘，先欲食長年菜，佮雞肉、菜頭粿啦。
A-niâ, seng beh chia̍h tn̂g-nî-chhài, kap ke-bah, chhài-thâu-kóe lah.
母：好，做你恬恬，我欲共恁逐家挾。猶明仔早起是食菜，毋通討欲食豬肉物件，下昏免細膩各人佮意隨便食。猶食飽，恁老爸有欲分錢予恁逐家硩年，著毋通走。
Hó, chò-lí tiām-tiām, góa beh kā lín ta̍k-ke nge̍h. Iáu bîn-á-chá-khí sī chia̍h-chhài, m̄-thang thó-beh chia̍h ti-bah mi̍h-kiāⁿ, e-hng bián-sè-jī kok-lâng kah-ì sûi-piān chia̍h. Iáu chia̍h-pá, lín lāu-pē ū-beh pun-chîⁿ hō͘ lín ta̍k-ke teh-nî, tio̍h m̄-thang cháu.
父：今日本大人不比清國，禁跋筊真嚴。分錢予恁，逐家千萬毋通跋。新正年頭若予巡查大人搧喙䫌，彼就衰潲。
Taⁿ Ji̍t-pún tāi-jîn put-pí Chheng-kok, kìm poa̍h-kiáu chin giâm. Pun-chîⁿ hō͘ lín, ta̍k-ke chhian-bān m̄-thang poa̍h. Sin-chiaⁿ-nî-thâu nā hō͘ sûn-cha tāi-jîn siàn-chhùi-phóe, he tō soe-siâu.
囝：今暝遐豐沛，又閣有錢通分，媠衫褲通穿，毋真暢！阮欲做乖乖。
Kim-mê hia phong-phài, iū-koh ū chîⁿ thang hun, súi saⁿ-khò͘ thang chhēng, m̄ chin thiòng! Goán beh chò koai-koai.
母：今，著較早睏，明仔早起透早欲拜神，逐人欲穿的新衫褲、鞋、帽仔物件，揣便下好好才去睏。
Taⁿ, tio̍h khah chá khùn, bîn-á-chá-khí thàu-chá beh pài-sîn, ta̍k-lâng beh chhēng ê sin saⁿ-khò͘, ôe, bō-á mi̍h-kiāⁿ, chhōe piān hē hó-hó chiah khì khùn.
◆
父：雞咯咯啼啦，逐家著起來洗面換衫拜天公，逐項攏創好，大細齊倚來燒香。
Ke ko̍k-ko̍k-thî lah, ta̍k-ke tio̍h khí-lâi sé-bīn ōaⁿ-saⁿ pài-Thiⁿ-kong, ta̍k-hāng lóng chhòng-hó, tōa-sè chê óa-lâi sio-hiuⁿ.
逐家深深拜：保護咱厝內平安，逐項順利。
Ta̍k-ke chhim-chhim pài: Pó-hō͘ lán chhù-lāi pêng-an, ta̍k-hāng sūn-lī.
伏惟：香煙沉沉，神心降臨。一請二請三請：三界神祇到座。弟子年祈年完，有求必應，深恩當報，厚德宜酬。敬具：上界齋蔬果品，下界三牲豬羊。伏乞鑒納，保我合家大吉大利，男添百福，女納千祥；讀書者，名標金榜；耕田者，積穀千倉；生理者，一文起本，萬貫收回；為工者，上迎下請。
Ho̍k-ûi: Hiong-ian tîm-tîm, Sîn-sim kàng-lîm. It-chhiáⁿ jī-chhiáⁿ sam-chhiáⁿ: Sam-kài Sîn-kî kàu-chō. Tē-chú liân-kî-liân-oân, iú-kiû-pit-èng, chhim-un-tong-pò, hō͘-tek-gî-siû. Kèng-kū: Siōng-kài chai-so͘ kó-phín, Hā-kài sam-seng ti-iông. Ho̍k-khit kàm-la̍p, pó góa ha̍p-ka tāi-kiat-tāi-lī, lâm-thiam-pek-hok, lí-la̍p chheng-siông; tha̍k-si-chiá, bêng-piau-kim-póng; keng-tiân-chiá, chek-kok-chhian-chhong; seng-lí-chiá, it-bûn-khí-pún, bān-koàn-siu-hôe; ūi-kang-chiá, siōng-gêng-hā-chhéng.
今，好燒金，放炮仔。紲後欲閣拜別位的神，知毋？
Taⁿ, hó sio-kim, pàng-phàu-á. Sòa-āu beh-koh pài pa̍t-ūi ê Sîn, chai m̄?
母：我知。收起趕緊才閣拜。
Góa chai. Siu-khí kóaⁿ-kín chiah-koh pài.
◆
新：春來先生𠢕早，新年恭喜。
Chhun-lâi sian-siⁿ gâu-chá, sin-nî kiong-hí.
春：逐家恭喜，今請入來坐。
Ta̍k-ke kiong-hí, taⁿ chhiáⁿ ji̍p-lâi chē.
新：這陣欲來去土地公佮三山國王彼幾位燒金，轉來才來拜候。
Chit-chūn beh lâi-khì Thó͘-tī-kong kap Sam-san-kok-ông hit kúi-ūi sio-kim, tńg-lâi chiah-lâi pài-hāu.
春：欸，毋通囉，新年新頭來到遮，毋著入來請茶，才有相好。
Eh, m̄-thang lo͘h, sin-nî sin-thâu lâi-kàu chia, m̄-tio̍h ji̍p-lâi chhiáⁿ-tê, chiah-ū siong-hó.
新：遐古意，無，逐家來共伊拜候才來去。
Hiah kó͘-ì, bô, ta̍k-ke lâi kā i pài-hāu chiah lâi-khì.
春：毋著按呢才好。逐家請坐，新春恭喜。
M̄-tio̍h án-ne chiah-hó. Ta̍k-ke chhiáⁿ-chē, sin-chhun kiong-hí.
新：逐家恭喜，這座厝起得真有款，遐囂俳。
Ta̍k-ke kiong-hí, chit-chō chhù khí tit chin ū-khoán, hia hia-pai.
◇囂俳：原底是寫做「華彩 ヒアパイ hia-pai」，日譯寫做「美觀」。臺日解說做「(1)華麗堂皇。(2)滿面得意的款式。得意甲氣勢凌人。」按呢，看起來，佇遮是好話，毋是歹話的款。
春：豈敢，草草起兩間仔來蹛爾爾。請各位來食茶。
Khí-kám, chhó-chhó khí nn̄g-keng-á lâi tòa niā-niā. Chhiáⁿ kok-ūi lâi chia̍h-tê.
新：遐便食你的發財茶，過了新正，予你大趁錢。
Hiah piān-chia̍h lí-ê hoat-châi-tê, kòe-liáu sin-chiaⁿ, hō͘ lí tōa thàn-chîⁿ.
春：逐家一樣趁錢。新春兄，請食甜，食了予你生好後生，富貴萬萬年。
Ta̍k-ke chi̍t-iūⁿ thàn-chîⁿ. Sin-chhun hiaⁿ, chhiáⁿ chia̍h-tiⁿ, chia̍h-liáu hō͘ lí seⁿ hó-hāu-seⁿ, hù-kùi bān-bān-nî.
新：食你的甜，予貴府一家團團圓圓造化是。
Chia̍h lí-ê tiⁿ, hō͘ kùi-hú chi̍t-ke thoân-thoân-îⁿ-îⁿ chō-hòa sī.
囝：阿爸，弄獅仔的佮歕新年的來囉，你知毋？
A-pah, lāng-sai-á-ê kap pûn-sin-nî-ê lâi lo͘h, lí chai m̄?
春：管伊來，神桌頭的紅包提便等伊就好。
Koán i lâi, sîn-toh-thâu ê âng-pau the̍h piān tán i tō hó.
新：春來先生，敢毋去燒金喔？
Chhun-lâi sian-siⁿ, kám m̄ khì sio-kim o͘h?
春：今仔日好日，猶閣好天，無，做陣來去。
Kin-á-ji̍t hó-ji̍t, iáu-koh hó-thiⁿ, bô, chòe-tīn lâi-khì.
新：真攪擾，今來去。
Chin kiáu-jiáu, taⁿ lâi-khì.
春：講啥貨，你按呢來，我極歡喜知毋！
Kóng siáⁿ-hòe, lí án-ne lâi, góa ke̍k hoaⁿ-hí chai m̄!
新：春來先生，你真𠢕吟詩，到遮遐好景，毋著吟寡來聽覓咧。
Tshun1-lâi sian-siⁿ, lí chin gâu gîm-si, kàu chia hiah hó-kéng, m̄-tio̍h gîm kóa lâi thiaⁿ-māi leh.
春：好，我吟予恁逐家聽。
香風撲鼻百花開，好鳥枝頭叫客來。
春入江山渾似畫，村村瑞氣滿樓臺。
春日晴和別有天，花開鳥唱太平年。
紅男綠女互相祝，放眼乾坤萬象鮮。
Hó, góa gîm hō͘ lín ta̍k-ke thiaⁿ.
Hiong-hong phok-phīⁿ pek-hoe-khai, Hó-niáu ki-thiô kiò-khek-lâi.
Chhun-ji̍p kang-san hûn-sū-ōe, Chhun-chhun sūi-khì boán-lô͘-tâi.
Chhun-ji̍t chêng-hô pia̍t-iú-thian, Hoa-khai niáu-chhiàng thài-pêng-liân.
Âng-lâm lio̍k-lí hō͘-siong-chiok, hòng-gán khiân-khun bān-siōng-sian.
新：先生就先生，吟了真好聽又閣真有趣味。
Sian-siⁿ chiū sian-siⁿ, gîm liáu chin-hó-thiaⁿ iū-koh chin-ū chhù-bī.
春：無。自日本大人來了，攏無學習，都袂記了了啊。
Bô. Chū Ji̍t-pún tāi-jîn lâi liáu, lóng-bô ha̍k-si̍p, to bē-kì liáu-liáu ah.
沒有留言:
張貼留言