討魚人 資產及生產調查的問答(前號之續) 區長役場用語 (其十六) 稻村生 語苑 1907年12月15日 第4卷第12號

討魚人 資產及生產調查的問答(前號之續) 區長役場用語 (其十六) 稻村生 　語苑 1907年12月15日 第4卷第12號

特藏臺灣期刊文獻 · 資產及生產調查的問答 (前號之續) · 國立臺灣大學圖書館數位典藏館

　

　你咧做啥頭路？

　Lí teh tsò siánn thâu-lōo?

　

　咧討魚，無做別項頭路。

　Teh thó-hî, bô tsò pa̍t-hāng thâu-lōo.

　

　今年的魚冬好毋好？

　Kin-nî ê hî-tang hó-m̄-hó?

　

　今年的魚冬卻袂歹。

　Kin-nî ê hî-tang khiok bē-pháinn.

　

　今年掠偌濟擔乎？

　Kin-nî lia̍h guā-tsē tànn honnh?

　

　掠有三千外斤。

　Lia̍h ū sann-tshing guā kin.

　◇一擔百斤，三千外斤是三十捅擔。

　

　你有創數簿無？

　Lí ū tshòng siàu-phōo bô?

　

　我毋捌字，袂曉記數。

　Guá m̄ bat-jī, bē-hiáu kì-siàu.

　

　你無記數，哪會記得三千外斤乎？

　Lí bô kì-siàu, ná-ē kì-tit sann-tshing-guā kin honnh?

　

　這是按呢的，掠較有的時十四五斤，較無的時差不多四五斤，一年扯勻拍算大約有三千斤。

　Tse sī án-ni--ê, lia̍h khah-ū ê sî tsa̍p-sì-gōo kin, khah-bô ê sî tsha-put-to sì-gōo kin, tsi̍t-nî tshé-ûn phah-sǹg tāi-iok ū sann-tshing kin.

　

　掠啥魚較濟乎？

　Lia̍h siánn hî khah tsē--honnh?

　

淡水魚爾爾，𩸙魚、鱸魚、烏仔魚、草魚，通有。  

　Tām-tsuí-hî niā-niā, tāi-hî, lôo-hî, oo-á-hî, tsháu-hî, thong-iú.

　

　扯勻一百斤偌濟錢乎？

　Tshé-ûn tsi̍t-pah kin guā-tsē tsînn honnh?

　

　𩸙魚佮烏仔魚參雜魚一百斤十二三箍，鱸魚一百斤十八九箍，攏總扯勻一百斤十四五箍啦。

　Tāi-hî kap oo-á-hî tsham tsa̍p-hî tsi̍t-pah kin tsa̍p-jī-sann khoo, lôo-hî tsi̍t-pah kin tsa̍p-peh-káu-khoo, lóng-tsóng tshé-ûn tsi̍t-pah kin tsa̍p-sì-gōo khoo lah.

　

　按呢，你一年的出利是有五百外箍乎？

　Án-ni, lí tsi̍t nî ê tshut-lī sī ū gōo-pah-guā khoo honnh?

　

　差不多是按呢。

　Tsha-put-to sī án-ni.

　

　猶你捌牽罟無？

　Iá lí bat khan-koo bô?

　

　毋捌，干焦拋手網爾爾。

　M̄ bat, kan-ta pha tshiú-bāng niā-niā.  

　

　有倩人無？

　Ū tshiànn--lâng bô?

　

　有倩一个划船的。

　Ū tshiànn tsi̍t-ê kò-tsûn--ê.

　

　一年偌濟倩的？

　Tsi̍t nî guā-tsē tshiànn--ê?

　

　一年六十箍。

　Tsi̍t nî la̍k-tsa̍p khoo.

　

　除起倩人的辛勞銀佮逐項的所費，一年敢長有四百箍無？

　Tû-khí tshiànn--lâng ê sin-lô-gîn kap ta̍k-hāng ê sóo-huì, tsi̍t-nî kánn tióng-ū sì-pah khoo bô?

　

　現時米遮呢貴，猶所費真傷重，一年長較無三百箍。

　Hiān-sî bí tsiah-nih kuì, iá sóo-huì tsin siong-tiōng, tsi̍t-nî tióng khah-bô sann-pah khoo.

　

　是按呢喔。不止延延你的工課，你請。

　Sī án-ni ooh. Put-tsí iân-tshiân lí-ê khang-khuè, lí tshiánn.

　◇ソウデスカ、御邪魔致シマタサョナラ。 そうですか、御邪魔致しまたさょなら。

　

　才閣來坐。

　Tsiah koh-lâi-tsē.