讀者之領分 臺南 陳炳森 語苑 1907年12月15日 第4卷第12號

 讀者之領分 臺南 陳炳森　語苑 1907年12月15日 第4卷第12號

特藏臺灣期刊文獻 · 讀者之領分 · 國立臺灣大學圖書館數位典藏館

　　

　阿貴仔，捾水來沃這盆花。

　A-kuì--á, kuānn-tsuí lâi ak tsit phûn hue.

　

　好，連鞭捾來。

　Hó, liâm-mi kuānn--lâi.

　

　頭家啊，有一个人客欲來揣你。

　Thâu-ke ah, ū tsi̍t-ê lâng-kheh beh lâi tshuē--lí.

　

　啥物人你知無？

　Siánn-mih-lâng lí tsai bô?

　

　頂日捷捷來彼个人啦。

　Tíng-ji̍t tsia̍p-tsia̍p lâi hit-ê lâng lah.

　

　乎按呢，是彼个本島人，姓潘名叫謙忠伊是毋？

　Honnh án-ni, sī hit-ê pún-tó-lâng, sènn Phuann miâ-kiò Khiam-tiong i sī-m̄?

　

　著，彼个人。

　Tio̍h, hit-ê lâng.

　

　你去叫伊入來坐。

　Lí khì kiò i ji̍p-lâi tsē.

　

　好，我才去講。

　Hó, guá tsiah khì kóng.

　

　先生啊，食飽未？

　Sian-sinn ah, tsia̍h-pá--buē?

　

　噯，你來是毋？遐罕行，入來坐。  

　A̍ih, lí lâi sī--m̄? Hiah hán-kiânn, ji̍p-lâi tsē.

　

　好好。

　Hó-hó.

　

　真久毋捌相見。

　Tsin kú m̄-bat sann-kìnn.

　

　彼有影，真久毋捌相見。

　He ū-iánn, tsin kú m̄-bat sann-kìnn.

　

　請坐請坐，請食薰。

　Tshiánn-tsē tshiánn-tsē, tshiánn tsia̍h-hun.

　

　免費神，你食你食。

　Bián-huì-sîn, lí tsia̍h lí tsia̍h.

　

　嚄，這盆花真媠，猶真大蕊。  

　Guā, tsit phûn hue tsin suí, iá tsin tuā luí.

　

　你有捌看見這號花毋？

　Lí ū bat khuànn-kìnn tsit-lō hue m̄?

　

　我未捌看見，本成本島無這號花。

　Guá buē-bat khuànn-kìnn, pún-tsiânn pún-tó bô tsit-lō hue.

　

　這个是英國的春仔花啦，你鼻看覓咧，真芳真芳。

　Tsit-ê sī Ing-kok ê tshun-á-hue lah, lí phīnn khuànn-māi leh, tsin phang tsin phang.

　　◇英國的春仔花，(對照日文)英国の薔薇(ばら)。  

　

　有影真芳，一欉幾个銀才買會著？

　Ū-iánn tsin phang, tsi̍t tsâng kuí ê gîn tsiah bé ē tio̍h?

　

　差不多著五箍銀。

　Tsha-put-to tio̍h gōo khoo gîn.

　

　嚄，貴甲按呢！  

　Guā, kuì kah án-ni!

　

　本島人這號花愛看毋？

　Pún-tó-lâng tsit-lō hue ài khuànn m̄?

　

　有錢人較愛看花。

　Ū-tsînn-lâng khah-ài khuànn-hue.

　

　無錢人按怎無愛？

　Bô-tsînn-lâng án-tsuánn bô-ài?

　

　愛都愛，毋久無閒袂得照顧。

　Ài-to-ài, m̄-kú bô-îng bē-tit tsiàu-kòo.

　

　真吵鬧你，今我欲轉去。  

　Tsin tshá-nāu--lí, tann guá beh tńg--khì.

　

　猶早啦，毋閣坐？

　Iá-tsá lah, m̄-koh-tsē?

　

　好，別日才閣來拜候。

　Hó, pa̍t-ji̍t tsiah-koh lâi pài-hāu.

　

　是按呢喔，今仔日真怠慢，無啥物通款待你，不止失陪失陪。

　Sī án-ni ooh, kin-á-ji̍t tsin tāi-bān, bô-siánn-mih thang khuán-thāi--lí, put-tsí sit-puê sit-puê.

　

　豈敢豈敢，你請。

　Khí-kám khí-kám, lí-tshiánn.

　

　閒才閣來𨑨迌。

　Îng tsiah-koh lâi tshit-thô.

　

　好好。

　Hó-hó.