上元暝 臺南 双木子 1910

 

上元暝 臺南 双木子

Siōng-guân-mê Tâi-lâm Siang-bo̍k-tsú

上元暝 · 上元之話 · 臺南 双木子 　語苑 1910年1月15日 第3卷第1號

特藏臺灣期刊文獻 · 上元之話 · 國立臺灣大學圖書館數位典藏館 

https://youtube.com/shorts/H-hnOKNzvso

　昨昏是上元暝，逐所在的店頭放煙火。好額人的祠堂，辦桌、祭祖公、做戲、放煙火，也紲弄龍。有个無做戲，叫藝旦來唱曲，親情五十攏來𨑨迌。

　Tsa-hng sī Siōng-guân-mê ta̍k sóo-tsāi ê tiàm-thâu pàng-ian-hué. Hó-gia̍h-lâng ê sû-tn̂g, pān-toh, tsè tsóo-kong, tsò-hì, pàng-ian-hué, iā suà lāng-lîng. Ū ê bô tsò-hì, kiò gē-tuànn lâi tshiùnn-khik, tshin-tsiânn-gōo-tsa̍p lóng lâi tshit-thô.

　囡仔攑兔仔燈，大人是粧十八嬈，沿街滿巷都鬧熱。

　Gín-á gia̍h thòo-á-ting, tuā-lâng sī tsng tsa̍p-peh-hiâu, iân-ke muá-hāng to lāu-jia̍t.  

　◇十八嬈，十八嬲，迎暗藝 （"上元" "十八嬲" - Google 搜尋）

　查某人出來行大肚；查某囡仔出來偷薅蔥，才會嫁好翁；袂生的查某出來偷拔籬荊，才會生；也一兼二顧，紲去宮廟燒金。

　Tsa-bóo-lâng tshut-lâi kiânn tuā-tōo; tsa-bóo gín-á tshut-lâi thau-khau tshang, tsiah ē kè hó ang; bē senn--ê tsa-bóo tshut-lâi thau pua̍h lî-king tsiah ē senn; iā it-kiam jī-kòo suà khì king-biō sio-kim.

　◇行大肚，行大路（"上元" "行大路" "行大肚" - Google 搜尋）

　◇籬荊：原文寫做「籬繭 リイ₅　ケエb₁ lî-king」。原對照日文為「子ヲ持タヌ婦人ハ他入ノ垣ノ竹ヲ抜キ取ル  子を持たぬ婦人は他入の垣の竹を抜き取る」。上元暝婦人人偷拔籬笆，「竹籬」，「得兒」也。（"上元" "得兒" - Google 搜尋）據此，「lî-king」是「籬荊」抑「籬莖」。

　逐家都欲排香案，燒月娘媽的金。持齋人（食菜人）對月娘媽香案前誦經，經誦了，下阮合家平安，年冬好收，眾人無病疼；查某囡仔下阮老爸老母康健有趁錢；查某人下阮丈夫勇健大趁銀，家官康健，後生無事路，長歲壽，好育飼，𠢕讀冊；大後生規矩疊實，趁錢來交阮，毋通嫖查某，會捌想，通來成家，蓄家伙；大查某囝嫁去予某人做新娘，保庇伊得家官疼，翁某和好，阮囝婿好字運，大發財；細漢查某囝嫁一个富標通的囝婿。

　Ta̍k-ke to-beh pâi hiunn-àn, sio Gue̍h-niû-má ê kim. Tshî-tsai-lâng (Tsia̍h-tshài-lâng) tuì Gue̍h-niû-má hiunn-àn tsîng siōng-king, king siōng liáu, hē guán ha̍p-ke pîng-an, nî-tang hó siu, tsìng-lâng bô pēnn-thiànn; tsa-bóo gín-á hē guán lāu-pē lāu-bú khong-kiān ū thàn-tsînn; tsa-bóo-lâng hē guán tiōng-hu ióng-kiānn tuā-thàn-gîn, ke-kuann khong-kiān, hāu-sinn bô sū-lōo, tn̂g-huè-siū, hó-io-tshī, gâu tha̍k-tsheh; tuā hāu-sinn kui-kí thia̍p-si̍t, thàn-tsînn lâi kau--guán, m̄-thang phiâu tsa-bóo, ē bat-siūnn, thang lâi sîng-ke, hak ke-hué; tuā-tsa-bóo-kiánn kè-khì hōo bóo-lâng tsò sin-niû, pó-pì i tik ke-kuann thiànn, ang-bóo hô-hó, guán kiánn-sài hó-jī-ūn, tuā huat-tsâi; sè-hàn tsa-bóo-kiánn kè tsi̍t-ê hù-phiau-thong ê kiánn-sài.

　◇富標通：富、才識、學問。富標通莫如我，食博𨑨不讓人。Hù phiau thong bo̍k jû ngóo, tsia̍h pua̍h tshit put jiōng jîn.（1914 臺灣俚諺集覽）。抑泉州話，有錢、標緻、學問（NewspaperSG - 星洲日报 (Xing Zhou Ri Bao), 24 April 1929, Page 18）

　守寡人講我無一半人，有破病，無人通照顧；後生查某囝攏細漢，家伙予人霸去；若有病疼，也無通請醫生。月娘媽，天跤下光，會光會暗，大事化小事，小事化無事，予我一家大細漢攏平安。別日阮後生大漢，有長志，娶新娘；查某囝嫁著好囝婿，來補我守苦節的功勞。我逐年備辦香花茶果，拜謝你月娘媽保庇的恩情。

　Tsiú-kuá-lâng kóng guá bô tsi̍t-puànn-lâng, ū phuà-pēnn, bô lâng thang tsiàu-kòo; hāu-sinn tsa-bóo-kiánn lóng sè-hàn, ke-hué hōo lâng pà--khì; nā ū pēnn-thiànn, iā bô thang tshiánn i-sing. Gue̍h-niû-má, thinn-kha-ē kng, ē-kng ē-àm, tuā-sū huà sió-sū, sió-sū huà bô-sū, hōo guá tsi̍t-ke-tuā-sè-hàn lóng pîng-an. Pa̍t-ji̍t guán hāu-sinn tuā-hàn, ū tsiáng-tsì, tshuā-sin-niû; tsa-bóo-kiánn kè-tio̍h hó kiánn-sài, lâi póo guá siú-khóo-tsiat ê kong-lô. Guá ta̍k-nî pī-pān hiunn-hue tê-kó, pài-siā Lí Gue̍h-niû-má pó-pì ê un-tsîng.

　◇一半人：（原文）一畔人，畔（ビアヌ puànn）。守寡人ハ私ハ片割者デスカラ 守寡人は私は片割者ですから。

　◇守苦節的功勞：（原文）守苦節能（會）功勞。「能（會）」疑有誤。（原日文）息女は好い婿を持ち其婿が私の守る此艱苦の中を補助して呉る、様になり其功労が顕はれましたら。