甘苦伯 陳雷 1993

 

甘苦伯 陳雷 1993 

Kan-khóo-peh Tân Luî 1993

　◇陳雷（吳景裕 1939年6月27日—2025年6月28日）

　◇原作：出國這項代誌 紀念葉豆記先生 二二八事件人物小說 台文通訊_1993-02-01_No17.pdf。為朗讀需要，有將原作小可修潤。

https://youtu.be/gCk0Lcpj-wI 

　二十四年前，欲出國彼年的熱人，我按台北轉去台南，去共親情朋友相辭，最後彼日，去看阿媽的墓。我想著阿媽以前上愛食甘苦伯仔的粽，所以透早就去上帝廟，欲去買粽，提去看阿媽的墓。

　Jī-tsa̍p-sì nî tsîng, beh tshut-kok hit nî ê jua̍h--lâng, guá àn Tâi-pak tńg-khì Tâi-lâm, khì kā tshin-tsiânn pîng-iú sio-sî, tsuè-āu hit ji̍t, khì khuànn A-má ê bōng. Guá siūnn-tio̍h A-má í-tsîng siōng-ài tsia̍h Kan-khóo peh--á ê tsàng, sóo-í thàu-tsá tō khì Siōng-tè-biō, beh khì bé tsàng, the̍h-khì khuànn A-má ê bōng.

　去到上帝廟，以前鬧熱的廟口無半人。廟的門頂吊一个新牌仔，頂面有寫：「中國青年反共救國團服務站」。我入去廟內，空空無半項，干焦一隻桌仔，兩个穿中山裝的查埔人坐佇遐，佮一个若像康樂隊的抹胭脂的小姐咧講笑食豆腐。我問𪜶賣粽的佇佗？𪜶毋應我，煞比桌頂的冊欲予我看。我斡去廟後壁，揣著顧廟的阿錢，伊佇遐咧掃塗跤。阿錢小學佮我仝班，和我上好。畢業了，伊的厝裡散赤，無閣讀冊，才來顧廟。

　Khì kàu Siōng-tè-biō, í-tsîng lāu-jia̍t ê biō-kháu bô-puànn-lâng. biō ê mn̂g-tíng tiàu tsi̍t-ê sin pâi-á, tíng-bīn ū siá: "Tiong-kok tshing-liân huán-kiōng kiù-kok thuân ho̍k-bū-tsām". Guá ji̍p-khì biō lāi, khang-khang bô-puànn-hāng, kan-na tsi̍t-tsiah toh-á, nn̄g-ê tshīng Tiong-san-tsong ê tsa-poo-lâng tsē tī hia, kap tsi̍t-ê ná-tshiūnn khong-lo̍k-tuī ê buah-ian-tsi ê sió-tsiá teh kóng-tshiò tsia̍h-tāu-hū. Guá mn̄g in bē-tsàng--ê tī tueh? In m̄ ìn--guá, suah pí toh-tíng ê tsheh beh hōo guá khuànn. Guá uat-khì biō āu-piah, tshuē-tio̍h kòo-biō ê A-Tsînn, i tī hia teh sàu-thôo-kha. A-Tsînn sió-ha̍k kap guá kāng-pan, hām guá siōng hó. Pit-gia̍p liáu, i ê tshù--ni̍h sàn-tshiah, bô koh tha̍k-tsheh, tsiah lâi kòo-biō.

　伊講頂個月警察大掠彼日，透早一个管區來廟裡，共逐家講，警察局新規定，袂使蹛廟裡排擔，叫逐家愛搬。逐家毋搬，共伊𧮙姦撟，甘苦伯仔𤆬頭，講：「是你搬抑是我搬？你毋成囡仔，我陳許來上帝廟賣粽的時，你尿帕仔就猶未焦！我搬？搬一箍𡳞鳥！」逐家攏毋振動。管區的無法度，轉去𤆬攑槌仔的警察來掠人。有一个警察欲來扛甘苦伯仔的粽，伊風火著起來，一枝扁擔按警察頭殼頂摃落去。彼警察無想著伊會出手，摃一下蹛塗跤喧。阿火仔一擔醬菜予警察捙倒，嘛來鬥拍。後來警察人濟，逐家拍袂贏，攏予掠去，干焦賣米糕的阿財先走，掠無著。上帝廟予救國團佔了後，逐家才徙去公園路。

　I kóng tíng-kò gue̍h kíng-tshat tuā-lia̍h hit ji̍t, thàu-tsá tsi̍t-ê kuán-khu lâi biō ni̍h, kā ta̍k-ke kóng, kíng-tshat-kio̍k sin kui-tīng, bē-sái tuà biō--ni̍h pâi-tànn, kiò ta̍k-ke ài puann. Ta̍k-ke m̄ puann, kā i tshoh-kàn-kiāu, Kan-khóo-peh--á tshuā-thâu, kóng: "Sī lí puann ia̍h-sī guá puann? Lí m̄-tsiânn-gín-á, guá Tân Khóo lâi Siōng-tè-biō bē-tsàng ê sî, lí jiō-phè-á tō iáu-buē ta! Guá puann? puann tsi̍t-khoo lān-tsiáu!" Ta̍k-ke lóng m̄ tín-tāng. Kuán-khu--ê bô-huat-tōo, tńg--khì tshuā gia̍h-thuî-á--ê kíng-tshat lâi lia̍h--lâng. Ū tsi̍t-ê kíng-tshat beh lâi kng Kan-khóo-peh--á ê tsàng, i hong-hué to̍h--khí-lâi, tsi̍t-ki pún-tann àn kíng-tshat thâu-khak-tíng kòng--lo̍h-khì. He kíng-tshat bô siūnn-tio̍h i ē tshut-tshiú, kòng tsi̍t-ē tuà thôo-kha suan. A-Hué--á tsi̍t-tànn tsiùnn-tshài hōo kíng-tshat tshia-tó, mā lâi tàu phah. Āu--lâi kíng-tshat lâng tsē, ta̍k-ke phah bē iânn, lóng hōo lia̍h--khì, kan-na bē-bí-ko--ê A-Tsâi sing tsáu, lia̍h bô tio̍h. Siōng-tè-biō hōo Kiù-kok-thuân tsiàm liáu-āu, ta̍k-ke tsiah suá-khì Kong-hn̂g-lōo.

　我離開上帝廟，行去公園路，路邊兩排整齊大欉的鹽桑仔樹拄好大生，鹽桑落甲規塗跤。我沿路行，沿路鼻鹽桑的味，會記得細漢的時，定定佇遮抾鹽桑來食。

　Guá lī-khui Siōng-tè-biō, kiânn-khì Kong-hn̂g-lōo, lōo-pinn nn̄g-pâi tsíng-tsê tuā-tsâng ê iâm-sng-á-tshiū tú-hó tuā-sinn, iâm-sng lak kah kui thôo-kha. Guá iân-lōo kiânn, iân-lōo phīnn iâm-sng ê bī, ē-kì-tit sè-hàn ê sî, tiānn-tiānn tī tsia khioh iâm-sng lâi tsia̍h.

　行無偌久，看著甘苦伯仔佇一欉大樹跤賣粽，生理嘛是遐好。伊看著我，叫我坐。伊的查某囝，名叫阿珠，佇遐鬥跤手。阿珠敨一粒粽，捀來我面前。我看面頭前的阿珠，十七、八歲，伊的目睭若像珍珠遐美麗。伊就是我所戀愛的人，囥佇心內，永遠無共伊講起。

　Kiânn bô-luā-kú, khuànn-tio̍h Kan-khóo-peh--á tī tsi̍t-tsâng tuā-tshiū-kha bē-tsàng, sing-lí mā-sī hiah hó. I khuànn-tio̍h guá, kiò guá tsē. I ê tsa-bóo-kiánn, miâ kiò A-Tsu, tī-hia tàu-kha-tshiú. A-Tsu tháu tsi̍t-lia̍p tsàng, phâng lâi guá bīn-tsîng. Guá khuànn bīn-thâu-tsîng ê A-Tsu, tsa̍p-tshit-peh huè, i ê ba̍k-tsiu ná-tshiūnn tsin-tsu hiah bí-lē. I tō-sī guá sóo luân-ài ê lâng, khǹg tī sim-lāi, íng-uán bô kā i kóng-khí.

　我看彼菜粽，圓圓的塗豆，金金的秫米，頂面一沿烏烏的豆油膏，白白的蒜頭，青青的芫荽，佮粽箬的味，布袋的味，濫濫做一伙，變做一種講袂出來的芳味，這就是甘苦伯仔自伊的阿公傳落來的菜粽特別的所在。伊的阿公自日本時代佇上帝廟賣粽，本來姓許，予一个姓陳的招，所以叫做陳許。後來叫了走音，煞變做甘許伯。

　Guá khuànn he tshài-tsàng, înn-înn ê thôo-tāu, kim-kim ê tsu̍t-bí, tíng-bīn tsi̍t-iân oo-oo-ê tāu-iû-ko, pe̍h-pe̍h ê suàn-thâu, tshinn-tshinn ê iân-sui, kap tsàng-ha̍h ê bī, pòo-tē ê bī, lām-lām tsò tsi̍t-hué, piàn-tsò tsi̍t-tsióng kóng bē tshut--lâi ê phang-bī, tse tō-sī Kan-khóo-peh--á tsū i ê A-kong thuân--lo̍h-lâi ê tshài-tsàng ti̍k-pia̍t ê sóo-tsāi. I ê A-kong tsū Ji̍t-pún sî-tāi tī Siōng-tè-biō bē tsàng, pún-lâi sènn Khóo, hōo tsi̍t-ê sènn Tân--ê tsio, sóo-í kiò-tsò Tân-Khóo. Āu--lâi kiò liáu tsáu-im, suah piàn-tsò Kam-khóo-peh.

　過一時了伊較閒，才來佮我講話，知影我欲出國，真歡喜，伊講：「恁少年人有機會出國上好…聽講美國真好額，你去看覓，看𪜶是按怎遐好額。」

　Kuè tsi̍t-sî liáu i khah îng, tsiah lâi kap guá kóng-uē, tsai-iánn guá beh tshut-kok, tsin huann-hí, i kóng: "Lín siàu-liân-lâng ū ki-huē tshut-kok siōng hó … thiann-kóng Bí-kok tsin hó-gia̍h, lí khì khuànn-māi, khuànn in sī án-tsuánn hiah hó-gia̍h." 

　我彼時拄才大學畢業，想講代誌捌真濟，就講：「美國好額，是𪜶政治好的關係。」

　Guá hit-sî tú-tsiah tāi-ha̍k pit-gia̍p, siūnn-kóng tāi-tsì bat tsin tsē, tō kóng: "Bí-kok hó-gia̍h, sī in tsìng-tī hó ê kuan-hē."

　伊聽了笑一下，「按呢你去美國讀一個政治博士，轉來做市長，看逐家會較好額抑袂？」

　I thiann liáu tshiò--tsi̍t-ē, "Án-ne lí khì Bí-kok tha̍k tsi̍t-ê tsìng-tī phok-sū, tńg-lâi tsò tshī-tiúnn, khuànn ta̍k-ke ē khah hó-gia̍h ia̍h-bē?"

　我聽了心內愛笑，問伊頂個月上帝廟掠人的代誌。伊幌頭，停一下問我：「美國敢有救國團？」

　Guá thiann liáu sim-lāi ài tshiò, mn̄g i tíng-kò-gue̍h Siōng-tè-biō lia̍h--lâng ê tāi-tsì. I hàinn-thâu, thîng--tsi̍t-ē mn̄g--guá: "Bí-kok kám-ū Kiù-kok-thuân?"

　我粽食了，伊毋提錢，伊講：「你美國轉來，我若猶有佇遮，才還我就好。」閣提三粒粽予我紮去看阿媽的墓。

　Guá tsàng tsia̍h-liáu, i m̄ the̍h tsînn, i kóng: "Lí Bí-kok tńg--lâi, guá nā iáu-ū tī tsia, tsiah hîng--guá tō hó." Koh the̍h sann-lia̍p tsàng hōo guá tsah-khì khuànn A-má ê bōng.

　伊猶會記得我的阿媽上愛食伊的粽，以前逐早起攏愛去買伊的菜粽。後來阿媽破病，厝裡的人講伊食藥袂使食秫米，毋予伊食粽。伊定定提錢叫我去買粽，藏蹛書包內面提轉來。阮兩人佇房間內，一人一粒菜粽食了了。阿媽若食粽就歡喜，精神就好起來，若像病攏無去。有一日，伊共我講：「榕仔，阿媽過身了，做忌的日逐項攏免，干焦這菜粽就好。」講了煞起愛笑，叫我喙拭拭咧出去，才袂予人看破跤手。

　I iáu ē-kì-tit guá ê A-má siōng ài tsia̍h i ê tsàng, í-tsîng ta̍k tsá-khí lóng ài khì bé i ê tshài-tsàng. Āu--lâi A-má phuà-pēnn, tshù--ni̍h ê lâng kóng i tsia̍h-io̍h bē-sái tsia̍h tsu̍t-bí, m̄ hōo i tsia̍h tsàng. I tiānn-tiānn the̍h tsînn kiò guá khì bé tsàng, tshàng-tuà tsu-pau lāi-bīn the̍h--tńg-lâi. Guán nn̄g lâng tī pâng-king lāi, tsi̍t-lâng tsi̍t-lia̍p tshài-tsàng tsia̍h-liáu-liáu. A-má nā tsia̍h tsàng tō huann-hí, tsing-sîn tō hó--khí-lâi, ná-tshiūnn pēnn lóng bô--khì. Ū-tsi̍t-ji̍t, i kā guá kóng: "Tshîng--á, A-má kuè-sin liáu, tsò-kī ê ji̍t ta̍k hāng lóng bián, kan-na tse tshài-tsàng tō hó." Kóng liáu suah khí ài-tshiò, kiò guá tshuì tshit-tshit--leh tshut--khì, tsiah bē hōo lâng khuànn-phuà-kha-tshiú.

　後來阿媽過身了，我去台北讀冊，做忌的日也罕得轉來。出國了後，一目𥍉仔過去二十外年。毋久佇外國實在無機會食著像甘苦伯仔彼款的粽。

　Āu--lâi A-má kuè-sin liáu, guá khì Tâi-pak tha̍k-tsheh, tsò-kī ê ji̍t iā hán-tit tńg--lâi. Tshut-kok liáu-āu, tsi̍t-ba̍k-nih-á kuè-khì jī-tsa̍p-guā nî. M̄-kú tī guā-kok si̍t-tsāi bô ki-huē tsia̍h-tio̍h tshiūnn Kan-khóo peh--á hit-khuán ê tsàng.

　四年前我轉去台灣，專工去台南看以前的舊厝。按火車頭行到台南病院，病院頭前彼條大溝攏是糞埽，臭，佮二十外年前相。來到公園路，差一屑仔認袂出來。以前兩排大欉整齊的鹽桑樹攏剉無去，路邊攏是懸懸低低的厝，路口我上愛去的小小的石頭起的圖書館嘛無去，佇彼个所在起一間七樓的百貨公司，人佮車塞甲滿滿是，閣吵閣臭，無像以前的青綠安靜，若像佇公園內面按呢。

　Sì nî tsîng guá tńg-khì Tâi-uân, tsuan-kang khì Tâi-lâm khuànn í-tsîng ê kū-tshù. Àn hué-tshia-thâu kiânn kàu Tâi-lâm pēnn-īnn, pēnn-īnn thâu-tsîng hit tiâu tuā-kau lóng sī pùn-sò, tshàu konn-konn, kap jī-tsa̍p-guā nî-tsîng sio-siāng. Lâi-kàu Kong-hn̂g-lōo, tsha tsi̍t-sut-á jīn bē tshut--lâi. Í-tsîng nn̄g-pâi tuā-tsâng tsíng-tsê ê iâm-sng-tshiū lóng tshò bô--khì, lōo-pinn lóng sī kuân-kuân-kē-kē ê tshù, lōo-kháu guá siōng ài khì ê sió-sió ê tsio̍h-thâu khí--ê tôo-su-kuán mā bô--khì, tī hit-ê sóo-tsāi khí tsi̍t-king tshit lâu ê pah-huè-kong-si, lâng kap tshia that kah muá-muá-sī, koh tshá koh tshàu, bô tshiūnn í-tsîng ê tshenn-li̍k an-tsīng, ná-tshiūnn tī kong-hn̂g lāi-bīn án-ne.

　我行過公園路，來到上帝廟，廟內有兩个人咧行棋。我問彼个穿短褲的中年人，敢知影以前彼个顧廟的阿錢佇佗？伊講伊就是！我驚一趒，認袂出伊就是我以前的同學，佮我上好的阿錢？閣瘦閣老，講話慢鈍，無一屑仔元氣。毋久伊猶會認得我。阮兩人見面真歡喜，伊𤆬我去伊的厝，佇上帝廟後壁巷仔內。伊講伊已經娶某生囝，最近身體無好，有肝病。伊介紹伊的某，原來就是阿珠，甘苦伯仔的查某囝，就是我心內的人。伊看起來猶真面熟，目睭像珍珠遐美麗，二十外年攏無變。

　Guá kiânn-kuè Kong-hn̂g-lōo, lâi-kàu Siōng-tè-biō, biō-lāi ū nn̄g-ê lâng teh kiânn-kî. Guá mn̄g hit-ê tshīng té-khòo ê tiong-liân-lâng, kám tsai-iánn í-tsîng hit-ê kòo-biō--ê A-Tsînn tī tueh? I kóng i tō-sī! Guá kiann-tsi̍t-tiô, jīn-bē-tshut i tō-sī guá í-tsîng ê tông-o̍h, kap guá siōng hó ê A-Tsînn? Koh sán koh lāu, kóng-uē bān-tūn, bô tsi̍t-sut-á guân-khì. M̄-kú i iáu ē jīn-tit guá. Guán nn̄g lâng kìnn-bīn tsin huann-hí, i tshuā guá khì i ê tshù, tī Siōng-tè-biō āu-piah hāng-á-lāi. I kóng i í-king tshuā-bóo senn-kiánn, tsuè-kīn sin-thé bô hó, ū kuann-pēnn. i kài-siāu i ê bóo, guân-lâi tō sī A-Tsu, Kan-khóo-peh--á ê tsa-bóo-kiánn, tō-sī guá sim-lāi ê lâng. I khuànn--khí-lâi iáu tsin bīn-si̍k, ba̍k-tsiu tshiūnn tsin-tsu hiah bí-lē, jī-tsa̍p-guā nî lóng bô piàn.

　阮三个人坐佇彼間小小的鉛鉼厝內面，講起我出國以前的代誌。阿珠猶會記得，我買粽藏蹛書包內底，我問伊猶有咧賣粽無？伊講伊的老爸過身了，就無閣賣粽，也無心情去縛粽。才講起甘苦伯仔的代誌。我出國了後無外久，有人風聲，講二二八事件的時，湯德章先生佇石像公園予人銃殺，去共湯德章收屍的就是上帝廟賣粽的甘苦伯仔。我會記得彼時湯德章先生予人銃殺了，伊的身屍擲佇石像公園，三暝三日無人敢去收埋。為著這項風聲，警察便衣定定來甘苦伯仔厝裡囉嗦，問東問西。過無偌久，有一日伊佇公園路口予一隻十輪大卡車挵死，硩死佇彼欉鹽桑樹的頭前，伊的菜粽掖甲一四界。

　Guán sann ê lâng tsē tī hit-king sió-sió ê iân-phiánn-tshù lāi-bīn, kóng-khí guá tshut-kok í-tsîng ê tāi-tsì. A-Tsu iáu ē-kì--tit, guá bé tsàng tshàng-tuà tsu-pau lāi-té, guá mn̄g i iáu ū teh bē tsàng bô? I kóng i ê lāu-pē kuè-sin liáu, tō bô koh bē tsàng, iā bô sim-tsîng khì pa̍k tsàng. Tsiah kóng-khí Kan-khóo peh--á ê tāi-tsì. Guá tshut-kok liáu-āu bô-guā-kú, ū-lâng hong-siann, kóng Jī-jī-pat sū-kiānn ê sî, Thng Tik-tsiong Sian-sinn tī Tsio̍h-siōng kong-hn̂g hōo-lâng tshìng-sat, khì kā Thng Tik-tsiong siu-si--ê tō-sī Siōng-tè-biō bē-tsàng--ê Kan-khóo-peh--á. Guá ē-kì-tit hit-sî Thng Tik-tsiong Sian-sinn hōo-lâng tshìng-sat liáu, i ê sin-si tàn tī Tsio̍h-siōng kong-hn̂g, sann-mê sann-ji̍t bô-lâng kánn khì siu-tâi. Uī tio̍h tsit-hāng hong-siann, kíng-tshat piān-i tiānn-tiānn lâi Kan-khóo-peh--á tshù ni̍h lo-so, mn̄g-tang-mn̄g-sai. Kuè bô guā kú, ū-tsi̍t-ji̍t i tī Kong-hn̂g-lōo kháu hōo tsi̍t-tsiah tsa̍p-lián tuā khah-tshia lòng--sí, teh sí tī hit tsâng iâm-sng-tshiū ê thâu-tsîng, i ê tshài-tsàng iā kah tsi̍t-sì-kè.

　我聽了真失望，也真艱苦，共𪜶兩人相辭。欠甘苦伯仔的錢想欲還阿珠，伊毋收。隔轉工，阿錢來揣我，手裡捾一捾粽。伊講阿珠知影我愛食伊老父的粽，出國無當食，特別做一捾欲予我提去。我提著遐的粽，鼻著甘苦伯仔的粽的味，心情佮彼捾粽平重。我的故鄉二十外年後猶原按呢迎接我，遮的像阿錢這款樸實的艱苦人…，彼个毋知偌久無心情縛粽的阿珠，…。我一手捾粽，一路聊聊仔行，行過開元寺，行出南門外，…，真遠才來到伊的墓地。

　Guá thiann liáu tsin sit-bōng, iā tsin kan-khóo, kā in nn̄g lâng sio-sî. Khiàm Kan-khóo-peh--á ê tsînn siūnn-beh hîng A-Tsu, i m̄ siu. Keh-tńg-kang, A-Tsînn lâi tshuē--guá, tshiú ni̍h kuānn tsi̍t-kuānn tsàng. i kóng A-Tsu tsai-iánn guá ài-tsia̍h i lāu-pē ê tsàng, tshut-kok bô-tàng tsia̍h, ti̍k-pia̍t tsò tsi̍t-c beh hōo guá the̍h--khì. Guá the̍h-tio̍h hia ê tsàng, phīnn-tio̍h Kan-khóo-peh--á ê tsàng ê bī, sim-tsîng kap hit-kuānn tsàng pênn-tāng. Guá ê kòo-hiong jī-tsa̍p-guā nî āu iu-guân án-ne gîng-tsiap--guá, tsia--ê tshiūnn A-Tsînn tsit-khuán phoh-si̍t ê kan-khóo-lâng …, hit-ê m̄-tsai guā-kú bô sim-tsîng pa̍k-tsàng ê A-Tsu, …. guá tsi̍t tshiú kuānn tsàng, tsi̍t-lōo liâu-liâu-á kiânn, kiânn-kuè Khai-guân-sī, kiânn tshut Lâm-mn̂g guā, …, tsin hn̄g tsiah lâi-kàu i ê bōng-tē.

　彼陣拄好是中晝，日頭當炎，我揣著伊的墓，佇一欉大欉玉蘭樹的邊仔。我共遐的粽囥蹛甘苦伯仔的墓前，坐蹛樹底，鼻著當開的玉蘭花。彼真久無鼻著的玉蘭花的芳味，即時共我出國以來，一直數念的故鄉的一寡代誌，攏𤆬轉來我的面前。我若像閣看著過身去的阿媽，看著公園路邊大欉的鹽桑樹，佮心愛的小小圖書館，佮賣粽的老阿伯…，才知影這攏是台灣頂一代，過去的人佮物，𪜶的歡喜佮艱苦，𪜶的好處佮歹處，攏是過去矣。雖然是按呢，毋久佮咱這代的台灣人也是分袂開，因為𪜶頂一代的人過去了後，又閣共𪜶保守的台灣的人情佮歷史交予下一代去負責。

　Hit-tsūn tú-hó sī tiong-tàu, ji̍t-thâu tng iām, guá tshuē-tio̍h i ê bōng, tī tsi̍t-tsâng tuā-tsâng gio̍k-lân-tshiū ê pinn--á. Guá kā hia ê tsàng khǹg-tuà Kan-khóo-peh--á ê bōng tsîng, tsē-tuà tshiū-té, phīnn-tio̍h tng-khui ê gio̍k-lân-hue. He tsin kú bô phīnn-tio̍h ê gio̍k-lân-hue ê phang-bī, tsik-sî kā guá tshut-kok í-lâi, it-ti̍t siàu-liām ê kòo-hiong ê tsi̍t-kuá tāi-tsì, lóng tshuā tńg-lâi guá ê bīn-tsîng. Guá ná-tshiūnn koh khuànn-tio̍h kuè-sin--khì ê A-má, khuànn-tio̍h Kong-hn̂g-lōo pinn tuā-tsâng ê iâm-sng-tshiū, kap sim-ài ê sió-sió tôo-su-kuán, kap bē-tsàng ê lāu a-peh …, tsiah tsai-iánn tse lóng-sī Tâi-uân tíng-tsi̍t-tāi, kuè-khì ê lâng kap mi̍h, in ê huann-hí kap kan-khóo, in ê hó-tshù kap pháinn-tshù, lóng-sī kuè--khì ah. Sui-liân sī án-ne, m̄-kú kap lán tsit tāi ê Tâi-uân-lâng iā-sī hun-bē-khui, in-uī in tíng-tsi̍t-tāi ê lâng kuè--khì liáu-āu, iū-koh kā in pó-siú ê Tâi-uân ê jîn-tsîng kap li̍k-sú kau hōo ē-tsi̍t-tāi khì hū-tsik.

　後來我佇一个真難得的機會中，得著一寡資料。才知影二二八事件的時，為湯德章先生收拾身屍的，並毋是上帝廟賣粽的甘苦伯，是台南大道公廟的廟公，名叫葉豆記的老先生。伊彼年年紀大概有八十歲左右。這个資料是葉豆記先生的一位後代直接共我講的。可惜伊並毋知葉先生共湯德章先生安葬的所在。

　Āu--lâi guá tī tsi̍t-ê tsin lân-tit ê ki-huē tiong, tit-tio̍h tsi̍t-kuá tsu-liāu. Tsiah tsai-iánn Jī-jī-pat sū-kiānn ê sî, uī Thng Tik-tsiong Sian-sinn siu-si̍p sin-si--ê, pīng-m̄-sī Siōng-tè-biō bē-tsàng--ê Kan-khóo-peh, sī Tâi-lâm Tāi-tō-kong-biō ê biō-kong, miâ-kiò Ia̍p Tāu-kì--ê lāu-sian-sinn. I hit nî nî-kí tāi-khài ū peh-tsa̍p huè tsó-iū. Tsit ê tsu-liāu sī Ia̍p Tāu-kì Sian-sinn ê tsi̍t-uī āu-tāi ti̍t-tsiap kā guá kóng--ê. Khó-sioh i pīng m̄ tsai Ia̍p Sian-sinn kā Thng Tik-tsiong Sian-sinn an-tsòng ê sóo-tsāi.

　所以我共故鄉台南的這件故事整理起來，一方面是用心來紀念葉豆記先生的這項事蹟，一方面是共這个資料做一个公開的記錄佮交代。無的確讀者中間或者有人知影，台南市佇二二八事件中犧牲的湯德章先生安葬的所在。

　Sóo-í guá kā kòo-hiong Tâi-lâm ê tsit-kiānn kòo-sū tsíng-lí--khí-lâi, tsi̍t-hong-bīn sī iōng-sim lâi kì-liām Ia̍p Tāu-kì sian-sinn ê tsit-hāng sū-tsik, tsi̍t-hong-bīn sī kā tsit-ê tsu-liāu tsò tsi̍t-ê kong-khai ê kì-lo̍k kap kau-tài. Bô-tik-khak tho̍k-tsiá tiong-kan hi̍k-tsiá ū-lâng tsai-iánn, Tâi-lâm-tshī tī Jī-jī-pat sū-kiānn tiong hi-sing ê Thng Tik-tsiong Sian-sinn an-tsòng ê sóo-tsāi.